Trazirat në Francë: 2 mijë 400 persona arrestuar, kryeministri akuzon grupet radikale
Trazirat në Francë vazhdojnë, me më shumë se 2 mijë 400 persona arrestuar pas përplasjeve mes protestuesve dhe policisë. Kryeministri Sébastien Lecornu ka deklaruar se vendosja e orës policore ka qenë efektive dhe se objektivi është një kthim i menjëhershëm i rendit.
Të paktën 2 mijë 400 persona janë arrestuar pas përplasjeve mes protestuesve dhe policisë në Francë. Gjatë trazirave, protestuesit dogjën automjete, sulmuan ndërtesa publike dhe grabitën biznese në Paris, Lion, Marsejë dhe qytete të tjera. Shtetrrethimi në Paris ishte në fuqi nga ora 23:00 e së hënës deri në orën 06:00 të së martës.
Kryeministri Sébastien Lecornu ka deklaruar se vendosja e orës policore ka qenë efektive dhe se objektivi është një kthim i menjëhershëm i rendit. Ai ka akuzuar grupet radikale ultra të majta për hartimin e një "plani kryengritjeje" që çoi në trazira të dhunshme gjatë fundjavës.
Ministri i Brendshëm Laurent Nunez ka njoftuar se Franca do të dërgojë disa forca ushtarake për të përforcuar policinë gjatë protestave të planifikuara të shtunën e ardhshme. Ministri i Drejtësisë, Gérald Darmanin, ka bërë të ditur se nga rreth 2,500 personat e arrestuar që prej së shtunës, 149 persona janë burgosur në të gjithë vendin, ndërsa më shumë se 800 të arrestuar janë paraqitur përpara prokurorëve. Ministri i Drejtësisë ka premtoi se protestuesit do të përballen me ndëshkime jashtëzakonisht të ashpra.
Presidenti amerikan, Donald Trump, ka reaguar ndaj situatës në Francë, duke kërkuar masa të forta për rivendosjen e rendit dhe sigurisë. Ai ka përshkruar Francën si një komb dikur të madh që ishte "pushtuar, plaçkitur dhe djegur deri në themel nga emigrantët, xhihadistët dhe komunistët". Trump ka kërkuar mbylljen e kufijve dhe marrjen e situatës nën kontroll.
Trazirat nuk janë kufizuar vetëm në Francë. Incidente të rënda janë raportuar edhe në Itali, veçanërisht në Milano, ku përplasjet mes të rinjve dhe policisë kanë shkaktuar dëme materiale dhe kanë lënë efektivë të plagosur. Zëvendëskryeministri dhe ministri i jashtëm Antonio Tajani ka njoftuar se vendosja e 500 trupave me kompetenca policore në Milano do të jetë ndër masat që kabineti i kryeministres Giorgia Meloni do të miratojë të martën në përgjigje të trazirave të fundjavës së kaluar nga të rinjtë në qytet.