Trump dhe Vance nisin programin 25 mln dollarësh për denoncimin e mashtrimeve me fondet publike

Presidenti amerikan Donald Trump dhe zëvendës presidenti J.D. Vance kanë prezantuar një program me vlerë fillestare prej 25 milionë dollarësh për të nxitur qytetarët të raportojnë raste të dyshuara të mashtrimit me fondet federale. Iniciativa parashikon shpërblime deri në 30 mijë dollarë për informacionin që çon në dënime për mashtrim ose në ndërhyrje të rëndësishme të autoriteteve federale.

Sipas raportimeve nga mediat e huaja, programi do të mbikëqyrët nga Departamenti i Drejtësisë dhe raportimet do të mund të paraqiten përmes platformës online fraud.gov. Megjithatë, paraqitja e një ankese nuk garanton përfitimin e shpërblimit, pasi informacioni duhet të sjellë rezultate konkrete.

Nisma është pjesë e fushatës së administratës Trump kundër abuzimit me paratë e taksapaguesve, veçanërisht në programet e mirëqenies sociale, kujdesit shëndetësor dhe subvencioneve qeveritare. Gjatë prezantimit, Trump i dha një çek prej 10 mijë dollarësh YouTuber-it konservator Nick Shirley, i cili kishte publikuar pretendime për mashtrime në institucione të kujdesit për fëmijët në Minesota.

Megjithatë, kontrollet fillestare kishin konstatuar se institucionet e inspektuara funksiononin normalisht, ndërsa hetimet më të gjera kanë vijuar për dyshime të tjera. Administrata amerikane e paraqet programin si një mekanizëm për rritjen e transparencës dhe llogaridhënies, ndërsa nisma merr edhe rëndësi politike në prag të zgjedhjeve të mesit të mandatit, të planifikuara për 3 nëntor.