Shpërthimi në Athinë: Shqiptari i dënuar për drogë, i dyshuar për shpërthimin në qendër të hetimeve

Një shtetas shqiptar, me precedent penal dhe qiramarrës në ndërtesën ku ndodhi shpërthimi në Athinë, është i dyshuar për autoritetet greke për ngjarjen që plagosi dy efektivë policie. Sipas mediave greke, ai po merret në pyetje nga policia, ndërsa hetuesit po shqyrtojnë mundësinë që ai të ketë lënë çantën me pajisjen shpërthyese në hyrje të ndërtesës ose që çanta të jetë vendosur aty nga një person tjetër.

Shqiptari dyshohet se ka zbritur nga banesa pasi dëgjoi shpërthimin dhe pasi kuptoi çfarë kishte ndodhur, është kthyer në apartament për të marrë disa sende përpara se të largohej. Autoritetet kanë bërë të ditur se ai është identifikuar, por gjatë marrjes në pyetje ka pretenduar se nuk ndodhej në vendngjarje në momentin e shpërthimit.

Mediat greke shkruajnë se shqiptari ishte arrestuar në vitin 2008 për posedim të 100 gramëve kokainë. Ai kishte vuajtur dënim me burg dhe ishte liruar në shtator të vitit të kaluar. Ndërkohë, hetuesit po verifikojnë edhe lidhjet e mundshme të tij me një tjetër shtetas shqiptar, i cili ndodhet prej kohësh në burg. Autoritetet greke po vijojnë hetimet për të zbardhur rrethanat e shpërthimit dhe për të përcaktuar përgjegjësinë e personave të përfshirë.