Policia identifikon grupet sekrete në Telegram për protestën e 24 tetorit

Policia e Shtetit ka nisur përgatitjet për protestën e paralajmëruar më 24 tetor para Kryeministrit, pas thirrjeve që kanë qarkulluar gjatë ditëve të fundit në rrjetet sociale. Gazetari i Euronews Albania, Eni Ferhati, për emisionin “Now” të Erla Mëhillit, deklaroi se strukturat e policisë po marrin masa për shtimin e forcave dhe hartimin e një plani operacional për ditën e shtunë.

Sipas Ferhatit, policia ka arritur të identifikojë grupet e komunikimit ku organizohen të rinjtë që marrin pjesë në protesta. Ai tha se këto grupe përdorin kryesisht aplikacionin Telegram dhe se policia shqiptare po i monitoron. “Nisur nga ajo që ka ndodhur gjatë javës së fundit, policia ka marrë informacion dhe ka thirrje publike në rrjetet sociale për një organizim ditën e shtunë, në datën 24, për një protestë ku është ftuar madje edhe diaspora”, deklaroi Ferhati.

Gazetari sqaroi se numri i ulët i protestuesve gjatë tubimit të sotëm kishte sjellë edhe një prani me të kufizuar të forcave të rendit, ndërsa për protestën e ardhshme policia po përgatit masa shtesë. Ferhati iu referua gjithashtu një investigimi të Fox News, i cili, sipas tij, ka identifikuar një rrjet ndërkombëtar prej 101 organizatash nga nenta vende, mes tyre edhe grupime që njihen me emrin “Antifa”. Megjithatë, ai nuk paraqiti prova konkrete që e lidhin këtë rrjet me organizatorët e protesteve në Tiranë.

Sipas informacionit që përcolli gazetari, në grupet e komunikimit në Telegram po qarkullon thirrja për një riorganizim të protestuesve më 24 tetor, të cilin organizatorët e kanë cilësuar si “akti i dytë”. Policia po përgatitet për këtë tubim duke u mbështetur te informacionet që ka mbledhur nga rrjetet sociale dhe grupet e komunikimit. Deri tani, deklarimet e Ferhatit nuk shoqërohen me një njoftim zyrtar të Policisë së Shtetit që të saktësojë shtrirjen e monitorimit apo masat konkrete të planit operacional.