Studentët serbë “pushtojnë” Beogradin, tubimi i madh përmbyllës i fushatës

Studentët serbë mbajtën një tubim të madh në Beograd, përpara zgjedhjeve parlamentare të së dielës. Turmat u drejtuan nga të gjitha anët drejt sheshit qendror Slavija, duke mbushur edhe disa rrugë përreth. Protestuesit valëvitën flamuj dhe brohoritën “Fitore”. Tubimi shënon kulmin e një lëvizjeje studentore që ka tërhequr vëmendjen jo vetëm në Serbi, por edhe në rajon dhe Evropë. Studentë dhe arsimtarë kanë treguar mënyrën se si lëvizja arriti të ruante vrullin e protestave dhe të shtrihej në të gjithë vendin. Sipas tyre, strategjia është mbështetur te një fushatë e organizuar derë më derë, marshimet paqësore, kontrolli i kujdesshëm i mesazhit publik dhe rotacioni i vazhdueshëm i drejtuesve. Ky i fundit, sipas tyre, ka synuar të shmangë përqendrimin e lëvizjes te figura të caktuara dhe t’i mbrojë individët nga fushatat denigruese të qeverisë.