Marjana Koçeku në CNN International: Protestat e të rinjve në Shqipëri dhe Serbi në fokus

Deputetja e pavarur e Kuvendit të Shqipërisë, Marjana Koçeku, u ftua në CNN International për të diskutuar protestat studentore dhe mobilizimin e të rinjve në Shqipëri dhe Serbi. Intervistës së zhvilluar nga gazetarja e njohur Christiane Amanpour dhe Catherine Bennhold, gazetare e “The New York Times”, iu dha vëmendje të veçantë zhvillimeve të fundit politike në Shqipëri.

Gjatë bisedës, Koçeku prezantoi para publikut ndërkombëtar shqetësimet dhe kërkesat e të rinjve shqiptarë, duke theksuar rëndësinë e reagimit të institucioneve ndaj tyre dhe nevojën për më shumë përgjegjshmëri dhe llogaridhënie. Ajo foli gjithashtu për vendimin e saj për t’u larguar nga Partia Socialiste gjatë verës së këtij viti dhe për t’iu bashkuar protestave qytetare.

Koçeku mbrojti legjitimitetin e kërkesave të protestuesve, duke nënvizuar se ato meritojnë vëmendjen e qeverisë dhe një përgjigje konkrete nga institucionet përgjegjëse. Ajo tha se protestat që nisën nga studentët gjatë javës së fundit në Shqipëri kanë të bëjmë më shumë se sa thjesht me arsimin. Është një ndërthurje e qeverisjes së dobët dhe e një partie politike shumë të fuqishme dhe e institucioneve që nuk janë në gjendje të funksionojnë mbi parimet e transparencës.

Gjatë intervistës u diskutua edhe situata politike në Serbi dhe protestat studentore atje. E pyetur nga Christiane Amanpour për zhvillimet në vendin fqinj, Koçeku u shpreh se një fitore e listës së studentëve kundër presidentit Aleksandar Vuçiç do të ishte një arritje jo vetëm për të rinjtë serbë, por për të gjithë rajonin e Ballkanit Perëndimor. Ajo tha se pjesëmarrja e studentëve në zgjedhjet në Serbi do të ketë padyshim ndikim, veçanërisht në vendet fqinje të Ballkanit Perëndimor.