Zonja e Parë e SHBA-së siguroi armëpushim në Oleshky të Ukrainës

Zonja e Parë e SHBA-së, Melania Trump, ka arritur një armëpushim të përkohshëm midis Rusisë dhe Ukrainës për qytetin ukrainas Oleshky, i pushtuar nga Rusia, për arsye humanitare. Njoftimi u bë nga zyra e saj, duke thënë se të dy vendet ranë dakord të ndalonin përkohësisht të gjitha veprimet ushtarake në qytetin jugor të Ukrainës për të lejuar hyrjen e ndihmës humanitare dhe për të përgatitur një evakuim të sigurt të civilëve përmes një kalimi i caktuar.

Armëpushimi i lokalizuar do të fillojë të enjten, më 29 tetor. Rusia dhe Ukraina nuk kanë komentuar mbi njoftimin e Zonjës së Parë. Por zyrtarët ukrainas treguan se ka pasur një marrëveshje paraprake në territorin e pushtuar nga Rusia në jug të Ukrainës.

Zyra e Zonjës së Parë bëri me dije se ajo punoi drejtpërdrejtë me udhëheqjen ruse dhe ukrainase për të përcaktuar kushtet e armëpushimit të lokalizuar. Ajo tha se situata në Oleshky është e tmerrshme dhe se qyteti është në vijën e parë të frontit të luftës në prag të katastrofës. Popullsia e mbetur e Oleshky përbëhet kryesisht nga banorë të moshuar që kanë nevojë urgjente për kujdes mjekësor, ilaçe, ushqim dhe ujë të pastër. Banorët e Oleshky kanë energji elektrike të kufizuar, jetojnë mes rrugëve të minuara dhe durojnë sulme të rregullta ushtarake. Ajo tha se pa ndërhyrjen e saj, mundësia për të sjellë ndihmë humanitare në qytet dhe për të evakuuar të moshuarit do të ishte e pamundur.

Zyra e saj njoftoi po ashtu se ajo filloi diskutimet me të dyja kombet dhe i harmonizoi palët mbi objektivat e marrëveshjes, procedurat teknike, kohën, proceset dhe kushtet, në rolin e saj formal si Ndërhyrëse Ekskluzive. Ajo tha se udhëheqës jo-ushtarakë, civilë nga të dy vendet do të punojnë së bashku për të vizituar banorët e Oleshky në shtëpitë e tyre dhe për të përcaktuar nivelin e ndihmës që u nevojitet. Banorët që deshirojnë të evakuohen do të marrin mbështetje dhe transport të koordinuar për në destinacionin e tyre të preferuar. Ajo parashikoi se disa do të duan të shkojnë në Rusi dhe disa në Ukrainë.