Kaosi në Itali, arrestohet kreu i lëvizjes “17 Tetori”

Një 30-vjeçar italian me origjinë marokanë është identifikuar nga policia si personi që qëndron prapa faqes në Instagram "Movimento 17 ottobre", e cila ka promovuar protestat në disa qytete të Italisë veriore. Ministri i Brendshëm i Italisë, Matteo Piantedosi, deklaroi se policia ka identifikuar një 30-vjeçar italian me origjinë marokanë si organizatorin e lëvizjes "17 Tetori", e cila ka promovuar demonstratat në disa qytete të Italisë veriore.

Policia ka kryer më shumë se 150 kontrolle në banesa në Milano, Monza dhe 20 qytete të tjera, kryesisht në rajonin e Lombardisë, në kuadër të hetimeve që pasuan trazirat e fundjavës së kaluar. Për sot janë parashikuar dhjetëra demonstrata në të gjithë Italinë.

Kontrollet urgjente në banesa, të nisura vetëm disa orë para një demonstratë që rrezikon të rikthejë tensionet dhe përplasjet në rrugët e Milanos, kanë përfshirë kryesisht studentë të universiteteve, por edhe nxënës të shkollave të mesme, të rinj dhe adoleshentë.

Nga informacionet e deritanishme, kontrollet nisën pas zbulimit të një bisede në WhatsApp, të gjetur në telefonin e një personi nën hetim për përplasjet e dhunshme në rrugë gjatë fundjavës së kaluar. Në këtë bisedë, hetuesit identifikuan disa mesazhe që i konsideruan kërcënuese, si dhe udhëzime të dyshuara organizative lidhur me marshimin e planifikuar për sot.

Bisedat dhe videot përmbanin "synime të shprehura qartë për sulme dhe grabitje ndaj pjesëtarëve të forcave të rendit, me qëllim marrjen e armëve të tyre të shërbimit". Këto synime të disa të rinjve përmenden në procesverbalin e kontrollit të banesave të disa personave që përgatiteshin të merrnin pjesë në demonstratën e sotme në Milano.