"Rama më i rrezikuar se kurrë: Analisti Ilir Kulla deklaroi se kryeministri është në momentin më të rrezikuar të pushtetit të tij"

Analisti Ilir Kulla deklaroi se kryeministri Edi Rama është në momentin më të rrezikuar të pushtetit të tij, duke e krahasuar situatën politike me një lojë shahu. Kulla tha se Rama ka arritur të bashkojë kundërshtaret dhe ka përfunduar me një kundërshtim të gjerë.

"Rama i është referuar politikës si fushë shahu. Ai luan shah mirë dhe shahu ka një parim: kur bien ushtaret, oficerët, mbretëresha, kuajt, ka mbetur vetëm mbreti. Nuk i dihet nga i vjen lëvizja e radhës. Është më i rrezikuar se kurrë në 14 vite", tha Kulla.

Kulla komentoi edhe kërkesën e kryeministrit për dorëheqjen e drejtuesve të institucioneve shtetërore. Ai e vlerësoi këto veprim, por theksoi se duhej të ishte ndërmarrë më herët dhe se ndryshimet duhet të shkojnë më tej.

"Për mendimin tim, ka bërë mirë që ka kërkuar dorëheqjet e tyre. Madje është i vonuar. Madje i them të thellohet, se ka edhe më shumë për të pastruar aty brenda. Rama mund të përballet edhe me ndonjë surprizë", deklaroi ai.

Sipas Kullës, një pjesë e drejtuesve kanë qëndruar në administratë prej vitesh, duke kaluar nga një institucion në tjetrin. Kulla tha se Rama ka një aftësi të bejë të gjithë armiqët e tij bashkë kundër vetes, dhe tani i ka bërë të gjithë kundër vetes.

Kulla parashikoi gjithashtu përplasje brenda Partisë Socialiste në rast të largimit të Ramës. Sipas analistit, figura e kryeministrit është elementi që i mbajnë bashkuar, përtej një ideologjie të përbashkët.

"Nëse Rama ikën sot, ata bëhen copë me njëri-tjetrin, sepse nuk kanë ideologji të përbashkët. I mban bashkë vetëm figura e tij", tha Kulla.