Ermalinda Rama dhe nëna e saj në gjyq për vrasjen e Anesti Ramës

Prokuroria e Fierit ka përfunduar hetimet për vrasjen e Anesti Ramës dhe ka dërguar çështjen në gjyq. Ermalinda Rama, 26 vjeç, akuzohet për vrasje për shkak të marrëdhënieve familjare, ndërsa nëna e saj, V.R., akuzohet për veprime që pengojnë zbulimin e së vërtetës.

Ngjarja ndodhi më 23 korrik 2025 në fshatin Frashër të Patosit, ku Anesti Rama u vra nga vajza e tij. Sipas Prokurorisë, Ermalinda i shtrëngoi të atit qafën me një lak teli, duke i shkaktuar asfiksi dhe vdekjen e menjëhershme.

Pas vrasjes, bashkëshortja e viktimës dhe nëna e të akuzuarës, V.R., dyshohet se kreu veprime për pastrimin e ambientit ku u gjet trupi dhe për larjen e tij. Këto veprime synonin ndryshimin ose fshehjen e gjurmëve të krimit, me qëllim pengimin e zbulimit të së vërtetës.

Prokuroria ka marrë në konsideratë deklarimet e administruara, rezultatet e ekspertimit mjekoligjor, këqyrjen e vendit të ngjarjes, sendet e sekuestruara dhe provat e tjera të mbledhura gjatë hetimit. Në bazë të këtyre provave, organi i akuzës ka arritur në përfundimin se Ermalinda Rama ka kryer veprimet që i shkaktuan vdekjen të atit, ndërsa V.R. ka ndërhyrë për të penguar zbardhjen e plotë të ngjarjes.

Të dyja të pandehurat prezumohen të pafajshme deri në marrjen e një vendimi gjyqësor të formës së prerë.