Rama paralajmëron "furtunë" ndaj protestuesve të dhunshëm

Kryeministri Edi Rama ka paralajmëruar krijimin e një regjistrë të posaçëm elektronik për personat që përfshihen në akte dhunë gjatë protestave dhe atyre që nxisin dhunën përmes rrjeteve sociale. Ai ka deklaruar se do të krijohet një regjistrë i posaçëm elektronik, i cili do të administrohet nga Policia e Shtetit dhe do të përmbyllë të dhënat e personave të referuar ose nën hetim për vepra penale kundër shtetit dhe rendit publik.

Rama ka paralajmëruar gjithashtu se Policia Kufitare dhe e Emigracionit do të ushtrojë kompetencat që i njeh ligji për të refuzuar daljen nga Shqipëria të personave që synojnë të shmangen dënimeve apo masave ligjore për këto vepra. Ai ka paralajmëruar gjithashtu se autoritetet shqiptare do të njoftojnë strukturat përkatëse të vendeve pritëse për rrezikun që, sipas tyre, paraqesin këta persona.

Rama ka theksuar se nxitja për dhunë në rrjetet sociale do të ndëshkohet kur thirrja krijon një rrezik real dhe të afërt. Dënimet, sipas tij, do të jenë më të rënda në rastet kur thirrjet u drejtohen fëmijëve ose kur pas tyre ndodhin akte dhunë.

Ai ka sqaruar se gazetaria dhe thirrjet politike nuk do të jenë objekt i këtyre ndëshkimeve. Rama ka njoftuar gjithashtu synimin për të përfshirë në Kodin Penal dispozita të posaçme për fshehjen e identitetit gjatë protestave, duke iu referuar modelit francez.

Sipas propozimeve të prezantuara, personat që kapen me sende të rrezikshme mund të dënohen deri në dy vite burg. Ndërkohë, mbajtja e maskës me qëllim ushtrimin e dhunës apo fshehja e fytyrës në rrethanat e parashikuara nga dispozitat e propozuara do të ndëshkohet me gjobë ose me burgim deri në gjashtë muaj.

Rama ka sqaruar se nga këto masa përjashtohen personat që mbulojnë fytyrën për arsye fetare apo shëndetësore. Ndryshimet e paralajmëruara synojnë të trajtojnë edhe kanosjet në hapësirën digjitale, si dhe përdorimin abuziv të inteligjencës artificiale.

Sipas kryeministrit, kanosja online ose publike do të trajtohet në një kuadër më të gjerë penal. Gjithashtu, krijimi dhe përdorimi i videove të falsifikuara me inteligjencë artificiale, në të cilat përdoret fytyra e një personi, parashikohet të përfshihet në legjislacionin penal.

Rama ka sqaruar se përmbajtjet satirike nuk do të ndëshkohen, për sa kohë identifikohen qartë si të tilla. Masat e prezantuara nga kryeministri përfshijnë si zbatimin e kompetencave ekzistuese të policisë, ashtu edhe ndryshime të propozuara në Kodin Penal.