Banorët e veriut të Kosovës presin një të ardhme më të mirë dhe paqe

Banorët serbë të veriut të Kosovës, të cilët biseduan me ekipin e Radios Evropa e Lirë, thonë se presin një të ardhme më të mirë dhe paqe, duke shpresuar për një rezultat të mirë në zgjedhjet e parakohshme parlamentare të Serbisë.

Njëri prej tyre, Bojani nga Mitrovica e Veriut, tha se pret që Beogradi zyrtar të kujdeset për pjesëtarët e komunitetit serb në Kosovë dhe t’i mbështesë ata. "Vetëm të kalojë gjithçka pa problem", tha ai.

Dragana nga Mitrovica e Veriut tha se është zgjuar në orën katër të mëngjesit, në mënyrë që të nisej me transport të organizuar drejt Rashkës për ta ushtruar të drejtën e saj të votës. "Jam e lodhur, nuk e di çfarë të pres. Jeta jonë [në Kosovë] është hiç, çfarë të pres, nuk di të them", shprehet ajo.

Ndërkohë, Zorani nga Leposaviqi tha se ka pritur gjatë në kufi që të mund ta ushtronte të drejtën e tij të votës, teksa shtoi se shpreson për një të ardhme më të mirë. "Shpresoj që për ne të jetë më mirë. Që në zgjedhjet e ardhshme të votoj në Leposaviq e jo këtu", shprehet ai.

Në mesin e 6.45 milion qytetarëve të regjistruar në listën e votuesve të Serbisë, më shumë se 115 mijë kanë adresë në Kosovë. Qytetarët serbë të Kosovës mund të votojnë në 60 vendvotime në katër komuna pranë kufirit me Kosovën: Vranjë, Rashkë, Tutin dhe Kurshumli.

Zgjedhjet e fundit parlamentare që Serbia organizoi në zonat e banuara me serbë në Kosovë u mbajtën më 21 qershor 2020. Ato u zhvilluan sipas praktikës së mëparshme, me misionin e Organizatës për Siguri dhe Bashkëpunim në Evropë (OSBE) në Kosovë që mblidhte votat. Fletëvotimet më pas numëroheshin në Serbi, në Rashkë dhe Vranjë.

Por, Qeveria e Kosovës, e udhëhequr nga Albin Kurti, ndërpreu këtë praktikë, duke kërkuar që Beogradi t’i drejtohet asaj me kërkesë për organizimin e zgjedhjeve, pa ndërmetësimin e OSBE-së. Serbia e ka refuzuar këtë, duke pretenduar se një hap i tillë do të nënkuptonte njohjen e pavarësisë së Kosovës.

Bashkësia ndërkombëtare i ka bërë thirrje disa herë Qeverisë së Kosovës që të gjejë mënyrën për të munduar qytetarët të votojnë në zgjedhjet e Serbisë.