"I ri rrëfen tmerrin që përjetoi gjatë protestës: Na u sulën për të na rrahur, theva këmbën gjatë hedhjes"

Një i ri ka treguar se si u dhunua fizikisht nga efektivët e policisë gjatë protestave në Tiranë. Ai ka thyer këmbën dhe është në spital për operacion.

Aureli, një nga protestuesit, ka treguar se ishte duke ecur pas mesnatës dhe ishte afruar pranë një parkimi për të parë një situatë ku disa persona po protestonin. Në atë moment, sipas tij, disa efektivë policie e kanë sulmuar duke e goditur me shkop gome dhe me shqelma. Si pasojë e dhunës, ai ka thyer këmbën dhe ka dëmtime të tjera në trup dhe tregon se ndodhet në spital duke pritur për të u nënshtruar një ndërhyrjeje kirurgjikale.

Aureli ka treguar se ishte duke vrapuar në ato momente dhe nuk ishte duke bërë asgjë. "Dhe duke u mbrojtur, duke vrapuar, u sulëm... Shkuam deri tek një... Ishin edhe disa protestues të tjerë aty, tek një bordurë, tek një parking bosh, ku kishte hyrje parkingu dhe kishte lartësi aty. Na shtynë aty dhe na sulën për të na rrahur me shkopinj gome, dhe ne u hodhëm të gjithë. Aty u hodha dhe unë dhe theva këmbën. Tani kam thyerje dhe mjekët më thonë që do shkojë për operacion, por nuk e di, do shohim deri nesër," tha ai.

Aureli është njëri prej protestuesve që u godit me shkop gome në tokë dhe u fut në furgon me këmbën e thyer. "Unë jam ai personi me kapuçin e verdhë, po, që më fusin në furgon me këmbën e thyer. Dhe aty pastaj vazhdojnë duke më rrahur akoma. Në furgon ishte vetëm një protestues aty. Dhe pastaj vjen shefi dhe i tha atyre: 'Vetëm këtë e keni kapur mo? Nxirrini më jashtë.' Dhe siç ishim ashtu të gjakosur, na kapën, unë me këmbën e thyer, na lanë në rrugë aty," tha ai.

Aureli tha se i tha policëve në ato momente: "Kam këmbën e thyer, që mos t'ju lëvizni." Biles, zëri i tij duke thënë "më është thyer këmba" degjohet në videot në Instagram dhe kudo. Ai tha se policët nuk reaguan që ta linin në tokë, ta merrnin ambulanca. "Jo, jo, aspak, aspak! Biles i thashë e 'të lutem më shoqëroni po deshën, unë vuaj edhe nga një sëmundje neurologjike autoimune, sklerozë multiple... Ua thashë edhe këta disa herë, ata prapë godisnin e dhunonin," tha ai.

Aureli tha se u goditën edhe brenda furgonit. "Më kanë goditur, kam fraktura dhe tek këmba e majtë, përveç këmbës së djathtë që më është thyer. Dhe gjithashtu tek hunda. Shyqyr kisha kapuçin sepse goditen gjithë ato herë në kokë. Unë aty e kuptova që ata policë nuk kishin njerëzi. Më përpara mendoja se: Okej, edhe ata janë njerëz, policë, që na mbrojnë në qoftë se ndodh diçka. Por dje më ndryshoi komplet mendimi. Nuk ishin njerëz, i pashë sy më sy, i gjakosur aty më dhunonin me këmbët e thyera," tha ai.