"Salianji sulmon Berishën: Është paterica e Ramës, nuk del në rrugë"

Ish-deputeti Ervin Salianji ka sulmuar Sali Berishën, duke e akuzuar atë për të qenë pengesa kryesore për ndryshimin politik dhe mbështetjen e Edi Ramës në pushtet. Salianji deklaroi se drejtimi aktual i opozitës nuk po krijon mundësi për rotacion politik, ndërsa Berisha ka bllokuar garën brenda Partisë Demokratike.

Salianji vlerësoi qëndrimet e Dashamir Shehit dhe pjesëmarrjen e studentëve, mjekëve dhe pedagogëve në protesta. "Berisha është paterica që mban në pushtet Ramën. Nëse nuk do të ishte Berisha, Rama do të binte në muajin e parë të protestave. Po dalin studentë, mjekë, pedagogë. Si mund të rrijë në krye të opozitës një njeri që nuk del dot në rrugë? Cili është interes i tij për të qëndruar, përveç interesit personal? Ky nuk la fare garë në parti. Identifikohet vetëm me opozitën, kur është pengesa për të sjellë ndryshimin", tha Salianji.

Salianji komentoi gjithashtu mungesën e reagimeve të përditshme nga ambasadat e huaja, të cilën e interpretoi si një mesazh politik për Ramën dhe Berishën. "Për herë të parë në historinë e protestave në Shqipëri, nuk kemi parë asnjë reagim çdo ditë nga ana e ambasadave të huaja. E kuptojnë njerëzit këtë gjë? Është e dukshme, Rama dhe Berisha po kërkojnë të çmontohen nga shoqëritë europiane. Këta po kërkojnë që ta mbajnë pushtetin me forca. Një njeri ka humbur syrin, është një ngjarje e dhimbshme, por për këta? Për fajin e Edi Ramës. Bizneset po pësojnë humbje masive, për çfarë? Për fajin e Edi Ramës. Taksat i paguajnë njësoj, ky shtet që ka krijuar Rama nuk po u jep asnjë ndihmë", tha Salianji.