Zelensky: Ukraina priti miratimin e SHBA-së për raketat Patriot dhe NASAMS për gati një muaj

Presidenti ukrainas, Volodymyr Zelenskyy, deklaroi të hënën se Kievi ka pritur prej gati një muaji miratimin e Sekretarit amerikan të Mbrojtjes, Pete Hegseth, për transferimin e raketave të mbrojtjes ajrore Patriot dhe NASAMS drejt Ukrainës. Përmes një postimi në platformën X, Zelenskyy bëri të ditur se i ka kërkuar ekipit të tij të ngrejë sërish këtë çështje me Uashingtonin, në përpjekje për të përshpejtuar furnizimet me armë të nevojshme për mbrojtjen e vendit. Sipas presidentit ukrainas, çështja u diskutua gjatë një takimi koordinues, ku në fokus ishin furnizimet me armatime nga partnerët ndërkombëtarë, si dhe përpjekjet për të rikthyer funksionimin e infrastrukturës energjetike të dëmtuar nga sulmet ruse. “Po punojmë në disa pista – me Shtetet e Bashkuara, Evropën dhe partnerë të tjerë që kanë stoqe të raketave PAC-2 dhe PAC-3”, deklaroi Zelenskyy, duke theksuar se miratimi për raketat Patriot dhe NASAMS mbetet ende në pritje. Ai bëri të ditur gjithashtu se gjatë takimit u diskutuan përgatitjet për mbledhjen e ardhshme të aleatëve të Ukrainës në formatin Ramstein, e planifikuar për muajin e ardhshëm. Zelenskyy nënvizoi nevojën për të përshpejtuar vendimet që kanë mbetur pezull, duke theksuar rëndësinë e çdo pakete ndihme për mbrojtjen e jetëve të qytetarëve ukrainas. Javën e kaluar, gazeta amerikane The Washington Post raportoi se administrata e presidentit Donald Trump kishte vonuar miratimin për transferimin e raketave interceptuese Patriot, të cilat Ukraina i konsideron thelbësore për t’u mbrojtur nga sulmet ruse me raketa dhe dronë. Sipas raportimit, Hegseth nuk i kishte refuzuar zyrtarisht transferimet e propozuara, por ende nuk kishte përfunduar procedurat e nevojshme për autorizimin e tyre. Vonesat vijnë në një periudhë tensionesh të shtuara mes presidentëve Donald Trump dhe Volodymyr Zelenskyy, si dhe të marrëdhënieve të përkeqësuara mes Uashingtonit dhe Kievit. The Washington Post, duke cituar një zyrtar amerikan dhe tre persona të tjerë të njohur me çështjen, raportoi se disa prej raketave pritet të transferohen nga vende partnere të Ukrainës, por dorëzimi i tyre kërkon miratimin e Sekretarit amerikan të Mbrojtjes. Kievi vijon t’u bëjë thirrje aleatëve për përshpejtimin e furnizimeve me sisteme dhe municione të mbrojtjes ajrore, në kushtet e sulmeve të vazhdueshme ruse ndaj territorit dhe infrastrukturës së vendit.