Lara Kolturi: Jam e dashuruar me Shqipërinë dhe me skitë që po zhvillohen aty

Lara Kolturi, skiatorja italiane që përfaqëson Shqipërinë, është një emër i njohur në skitë alpine. Ajo nuk është vetëm një skiator e talentuar, por edhe një figurë që po ndikon në zhvillimin e sportit të skive në Shqipëri.

Pas shtetësisë shqiptare, Kolturi vendosi të përfaqësojë Shqipërinë në vend të Italisë. Ky vendim i dha mundësinë të zhvillohej jashtë strukturave të Federatës Italiane të Skive dhe të ndiqte një program të përshtatur sipas nevojave të saj.

Rezultatet e saj kanë justifikuar këtë zgjedhje. Falë paraqitjeve të saj, Shqipëria po bëhet gjithnjë e më e njohur në Kupën e Botës në skitë alpine. Kolturi ka thënë se mbështetja që merr është jashtëzakonshme dhe se ajo është e dashuruar me Shqipërinë dhe me skitë që po zhvillohen aty.

“Kam qenë edhe me pushime në Shqipëri dhe jam dashuruar me këtë vend”, tha Kolturi për “blue Sport” pas vendit të dytë që shënoi të shtunën në sllallomin gjigant në Solden. Ajo që e bën veçanërisht krenare është ndikimi që rezultatet e saj po kanë në rritjen e interesit për skitë në Shqipëri.

“Është njësoj si në rastin e Lucas Braathen dhe Brazilit. Vende që më parë nuk ishin pjesë e hartës së skive, tani po bëhen protagonistë. Më bën jashtëzakonisht krenare fakti që Shqipëria po merr më shumë vëmendje falë meje”, deklaroi Kolturi.

Sipas saj, interesi për këtë sport është rritur ndjeshëm edhe në mesin e shqiptarëve, ndonëse skitë alpine nuk janë pjesë e traditës sportive të vendit.

“Njerëzit i ndjekin garat e skive në televizor, edhe pse ky sport nuk është pjesë e kulturës së tyre. Ata i shohin garat dhe më pas dëshirojnë të vijnë këtu për të bërë ski dhe për të parë borën, të cilën ndoshta nuk e kanë parë kurrë më parë. Është e mrekullueshme të shohësh se si po rritet ky sport”, përfundoi Kolturi.

Tifozët shqiptarë do të kenë mundësi ta ndjekin Kolturin në muajin dhjetor, kur në St. Moritz të Zvicrës janë programuar një garë e sllallomit gjigant dhe dy gara të super-G.