Rama mbrohet kundër protestave: Duan të më largojnë, por unë nuk iki!

Kryeministri Edi Rama ka deklaruar se nuk do të jepë dorëheqjen, pavarësisht protestave të studentëve dhe qytetarëve që kanë perfshirë Tiranën në javët e fundit. Në një intervistë për gazetën greke "Kathimerini", Rama është pyetur nëse do të jepë dorëheqjen, një nga kërkesat kryesore të protestuesve. Përgjigja e tij ka qenë e qartë: "Jo".

Rama ka mbrojtur mandatin e marrë në zgjedhje, duke argumentuar se ndryshimi i pushtetit duhet të vijë përmes votës dhe jo përmes presionit të protestave. Sipas tij, një pjesë e demonstruesve po përdorin dhunën për të arritur qëllime politike.

Rama ka deklaruar se nuk ka pretenduar se gjithçka në Shqipëri është bërë mirë. Nuk beson se të rinjtë duhet të pranojnë vetëm atë që kanë arritur deri më tani. Shqetësimet e tyre në lidhje me arsimin, koston e jetës dhe mungesën e mundësive reale janë të vlefshme dhe kërkojnë përgjigje thelbësore. Buxheti i vitit 2027, të cilin do ta paraqesim shpejti, përfshin masa shtesë për familjet, shërbimet publike dhe studentët. Në të njëjten kohë, i kam ftuar studentët dhe mësuesit në një dialog të hapur. Jam i gatshëm të shqyrtoj çdo propozim serioz, madje edhe ato që vijnë nga kritikët tanë më ashpër.

Megjithatë, ekziston një vijë e qartë ndërmjet studentëve që duan një të ardhme më të mirë dhe grupeve të mbuluara me kapuçë - përfshirë njerëz që i kam lidhur me lëvizjen Antifa - të cilët hedhin kokteje Molotov, sulmojnë ndërtesa publike dhe demtojnë pronë private. Luftimi i korrupsionit është përgjegjësi e institucioneve të Drejtësisë. Nuk është puna e atyre që përdorin dhunën si mjet për të pretenduar se përfaqësojnë një brez të tërë.

Rama ka deklaruar se nuk ka ndërmend të jepë dorëheqjen. Në një demokraci, qeveritë ndryshojnë nëpërmjet zgjedhjeve, jo me kokteje Molotov. Populli shqiptar na dha një mandat të qartë vitin e kaluar dhe unë kam ndërmend ta zbatoj atë. Kushdo mund të kërkojë dorëheqjen time, kjo është pjesë e jetës demokratike. Askush nuk ka të drejtë ta imponojë atë me forcë. Detyra ime është të degjoj ankesat e vlefshme, të mbroj të drejtat e qytetarëve dhe të vazhdoj punën e integrimit të Shqipërisë në Bashkimin Evropian. Unë nuk do të devijoj nga kjo detyrë sepse një pakicë beson se djegia e vendit është rruga më e shkurtër drejt pushtetit.