Karamuço: Prokuroria duhet të informojë publikun për ecurinë e hetimeve për Erjon Vishkullin

Eksperti i kriminalistikës Ervin Karamuço ka thënë se Prokuroria e di çfarë ka ndodhur me Erjon Vishkullin dhe duhet të informojë publikun për ecurinë e hetimeve. Ai tha se para sekuestrimit të kamerave dhe armëve, hetuesit kanë pasur mundësi të shohin pamjet dhe të kryejnë matjet e përllogaritjet. Karamuço tha se Prokuroria disponon të dhëna paraprake të siguruara në rrugë operative nga Italia, të cilat duhet të përcillen përmes letërporosisë që të mund të përdoren si prova të ligjshme në hetim. Ai tha se Prokuroria duhet të jetë më transparente dhe të informojë publikun për një çështje kaq të rëndësishme dhe të rëndë që ka ndodhur. Karamuço tha se Prokuroria duhet të dilte dhe të informonte publikun mbi veprimet që po kryhen dhe gjetjet aktuale, për aq sa këto informacione nuk dëmtojnë hetimin.