Dy të dyshuar për vrasjen e 66-vjeçarit në Sarandë, arrestohen në Greqi
Dy shtetas shqiptarë, Lulëzim Tabaku dhe Idriz Çelo, janë arrestuar në Greqi për përfshirje në vrasjen e 66-vjeçarit Rexhep Ismaili në Sarandë më 7 maj 2026.
Policia e Shtetit njofton se janë arrestuar dy shtetas të shpallur në kërkim për ngjarjen e rëndë të ndodhur më 7 maj 2026, në fshatin Gjashtë të Sarandës, ku mbeti i vrarë me armë zjarri 66-vjeçari Rexhep Ismaili. Dyshohet se 37-vjeçari Lulëzim Tabaku ka vrarë me armë zjarri 66-vjeçarin, si dhe se 40-vjeçari Idriz Çelo ka qenë i përfshirë në konfliktin që parapriu krimin. Sipas Policisë, Gjykata e Sarandës ka caktuar masën e sigurisë “Arrest në burg” për 37-vjeçarin, i cili akuzohet për veprat penale “Vrasja me dashje”, “Mbajtja pa leje dhe prodhimi i armëve, armëve shpërthyese dhe i municionit” dhe “Kanosja”, kryer në bashkëpunim. 40-vjeçari kërkohej për veprat penale “Moskallëzimi i krimit”, “Kanosja” dhe “Shkatërrimi i pronës”. Sipas autoriteteve, ai ishte ndaluar në ishullin e Korfuzit, ku dyshohet se përdorte identitet të rremë për të qëndruar në Greqi. Nga hetimet paraprake dyshohet se më 7 maj 2026, 37-vjeçari ka vrarë me armë zjarri, pistoletë, 66-vjeçarin R. I., në ambientet e lokalit në pronësi të këtij të fundit, në fshatin Gjashtë të Sarandës. Ngjarja dyshohet se erdhi pas një konflikti me sende të forta mes disa personave, ku ishte i përfshirë edhe 40-vjeçari i arrestuar në Korfuz. Policia bën me dije se vijon puna për lokalizimin dhe kapjen e personave të tjerë të shpallur në kërkim në lidhje me këtë ngjarje.