Confindustria kundër rritjes së taksave në Paketën Fiskale 2027

Shoqata e Industrialistëve Italianë në Shqipëri, Confindustria, ka dalë kundër propozimeve për rritjen e taksave në Paketën Fiskale 2027. Në një komunikatë për shtyp, Confindustria vë në pikëpyetje përmbushjen e zotimit të mëparshëm të qeverisë për të mos ndryshuar normën 15% të tatimit mbi fitimin për biznesin e madh gjatë mandatit qeverisë.

Sipas propozimeve të Paketës Fiskale 2027, tatimi mbi fitimin parashikohet të rritet në 17%, tatimi mbi dividendin nga 8% në 15%, ndërsa TVSH-ja standarde nga 20% në 21%. Confindustria kërkon transparencë mbi nevojën për këto ndryshime dhe alternativat që janë shqyrtuar përpara se barra financiare t’u kalojë sërish bizneseve dhe qytetarëve.

Shoqata i referohet të dhënave të Ministrisë së Financave për periudhën janar-shtator 2026, sipas të cilave të ardhurat buxhetore kanë tejkaluar shpenzimet me rreth 70.3 miliardë lekë. Megjithatë, Confindustria sqaron se ky suficit nuk përfaqëson rezultatin përfundimtar të vitit dhe nuk provon se të gjitha fondet janë të lira për t’u përdorur.

Confindustria paralajmëron se një ndryshim i tillë mund të ndikojë në kthimin neto nga kapitali dhe të çojë në shtyrjen, zvogëlimin ose zhvendosjen e disa investimeve drejt tregjeve të tjera. Kundërshtimet e shoqatës përfshijnë edhe rritjen e propozuar të TVSH-së standarde nga 20% në 21%, për të cilën kërkohet një vlerësim i plotë i ndikimit mbi konsumin dhe çmimet.

Shoqata thekson se nuk kundërshton nevojën për financimin e shërbimeve publike, por kërkon të dhëna mbi rezultatet e luftës kundër evazionit fiskal, alternativat për zgjerimin e bazës tatimore dhe efikasitetin e shpenzimeve publike. Në përfundim, shoqata kërkon tërheqjen e rritjeve të propozuara, publikimin e një analize të ndikimit të kombinuar të masave dhe zhvillimin e një konsultimi real me biznesin, me mundësi konkrete për të ndikuar në vendimmarrje.