Gjykata Administrative e Apelit pezullon bojkotin e avokatëve, zhbllokohen proceset në GJKKO

Gjykata Administrative e Apelit ka vendosur të pezullojë efektet e vendimit për bojkotin e avokatëve, të miratuar nga Këshilli Drejtues i Dhomës së Avokatisë, deri në shqyrtimin e çështjes në themel. Vendimi vjen pas kërkesës së Shoqatës së Avokatëve Antikorrupsion, e cila kundërshtoi bojkotin e vendosur nga Dhomë e Avokatisë.

Përmes këtij vendimi, pezullohet përkohejsisht bojkoti, duke i hapur rrugën vijimit të proceseve gjyqësore në Gjykatën e Posaçme kundër Korrupsionit dhe Krimit të Organizuar. Avokatët kishin ndërprerë pjesëmarrjen në seancën në shenjë kundërshtie ndaj rregullores që ndalon mbajtjen e telefonave cellulare brenda sallave të gjyqit. Masa e pezullimit do të mbetë në fuqi deri në shqyrtimin e çështjes nga gjykata, ndërsa vendimi përfundimtar do të percaktojë ligjshmërinë e bojkotit të avokatëve.