Rama: Nafta do të ulen me 32 lekë, por taksa nuk do të falen

Kryeministri Edi Rama ka paralajmëruar ndryshime në sistemin e taksimit të karburanteve, duke deklaruar se çmimi i naftës në pikat e furnizimit do të ulen me 32 lekë për liter. Por, ndërsa në pamje të pare kjo paraqitet si një lehtësim për drejtuesit e automjeteve, taksa e qarkullimit nuk do të zhduket. Ajo do të zhvendoset nga çmimi i karburantit te vetë automjetet, duke u mbledhur përmes Drejtorisë së Përgjithshme të Shërbimeve të Transportit Rrugor.

Pra, qytetarët mund të paguajnë më pak në pompë, por kjo nuk do të thotë domosdoshmërisht se do të paguajnë më pak taksa në total. Kreu i qeverisë njoftoi gjithashtu vendosjen e një takse të re qarkullimi për automjetet me targa të huaja që hyjnë në territorin shqiptar.

“Do të heqim taksen e qarkullimit nga çmimi i naftës dhe do të ulim 32 lekë në pompë, çmimin e naftës, ndërkohë që taksen do të vendosim tek makina dhe do ta mbledhim përmes drejtorisë së transportit rrugor. Do vendosim një takse të re qarkullimi për makinat e huaja që hyjnë në Shqipëri”, tha Rama.

Ndryshimi i paralajmëruar ngre pyetje të mëdha mbi përfitimin real të qytetarëve, pasi ende nuk është bërë e qartë sa do të jetë taksa që do të paguhet për çdo automjet dhe nëse ajo do të kompensojë kursimin nga ulja e çmimit të naftës.

Në thelb, taksa nuk hiqet nga barra fiskale e drejtuesve të mjeteve, por vetëm ndryshon vendin ku paguhet. Mbetet për të parë nëse kjo skemë do të sjellë një ulje reale të kostove për qytetarët apo thjesht një faturë që, në vend të pompës së karburantit, do të paguhet në një tjetër sportel.