Protesta në Tiranë për vrasjen e Arlinda Zekajt

Kolektivi Feminist në Shqipëri zhvilloi sot një aksion simbolik para Ambasadës së Kosovës në Tiranë, në shenjë proteste për vrasjen e Arlinda Sylaj Zekajt në Pejë. Aktivistet kërkuan përgjegjësi institucionale për mënyrën se si u trajtua rasti i saj dhe cilësuan vrasjen si pasojë të dështimit të mekanizmave shtetërorë për mbrojtjen e grave nga dhuna. "Nëse shteti nuk mund t’i mbrojë gratë, atëherë gratë duhet ta shkundin shtetin deri në themel", tha aktivistja Jeta Kaçka. Kaçka solli në vëmendje letrën që Zekaj i kishte dorëzuar kryeprokurores së Prokurorisë Themelore në Pejë, Lumturije Vuçetaj, në të cilën ajo i kërkonte marrjen e masave ndaj zyrtarëve që kishin dështuar në përmbushjen e detyrave dhe në zbatimin e vendimit gjyqësor. Letrën e mbylli me fjalët: “Uroj që të mos vijë dita kur ju dhe institucionet përgjegjëse të detyroheni të jepni llogari vetëm pasi të jetë marrë jeta ime.” Sipas mediave të Kosovës, Prokuroria Themelore në Pejë ka konfirmuar se e pranoi parashtresën më 22 tetor dhe se ajo u regjistrua për trajtim nga prokurori kompetent, për të vlerësuar nëse kishte përgjegjësi penale për “keqpërdorim të pozitës apo autoritetit zyrtar”. Më 23 tetor, Prokuroria ngriti aktakuzë ndaj Jeton Sylajt për kanosje në marrëdhënie familjare. Po atë ditë, një zyrtar policor kërkoi që për Zekajn të shtoheshin masat e sigurisë dhe që patrullat ta vizitonin çdo ditë në shtëpi. Më 25 tetor, Zekaj e denoncoi sërish në polici ish-bashkëshortin, duke pretenduar se e kishte kërcënuar. Ai u ndalua për 48 orë. Zekaj refuzoi të shkonte në strehimore dhe kërkoi të kthehej në shtëpinë e saj. Ajo deklaroi se nuk ndihej mjaftueshëm e sigurt, por nuk donte të hiqte dorë nga djali dhe pasuria e saj. Po atë ditë, policia e shoqëroi në banesë. Rreth orës 21:10, policia u njoftua se 49-vjeçarja ishte gjetur pa shenja jete. Sipas autoriteteve, ajo dyshohet se u vra me një mjet të fortë nga ish-kunati, Albert Sylaj, ndërsa ish-bashkëshorti i saj ndodhej në ndalim.