Prokuroria Fier dërgon në gjyq noteren për falsifikim të dokumenteve noteriale

Prokuroria e Fierit ka përfunduar hetimet dhe ka dërguar për gjykim noteren me inicialet A.H., e akuzuar për falsifikim të përsëritur të dokumenteve noteriale gjatë periudhës 2011–2020. Sipas Prokurorisë pranë Gjykatës së Shkallës së Parë të Juridiksionit të Përgjithshëm Fier, e pandehura akuzohet për veprën penale “Falsifikimi i dokumenteve” nga personi që ka për detyrë t’i lëshojë ato, e kryer më shumë se një herë. Në përfundim të hetimeve për procedimin penal nr. 1050, të regjistruar në vitin 2019, organi i akuzës dyshon se noterja ka hartuar dhe lëshuar në mënyrë të përsëritur akte noteriale duke përdorur emrat e noterëve të tjerë, të cilët nuk kanë qenë autorë të dokumenteve përkatëse. Gjithashtu, nga hetimi rezultoi se, gjatë viteve 2011–2018, janë hartuar kontrata për shitjen e automjeteve, të cilat nuk janë regjistruar në regjistrat përkatës noterialë të noterëve në emër të të cilëve janë lëshuar. Sipas provave të administruara, në një numër të konsiderueshëm rastesh është përdorur emri i një notereje me zyrë në Tiranë, ndërsa aktet përkatëse dyshohet se janë hartuar në Fier nga e pandehura. Njëkohësisht ndaj së njëjtës notere, në kuadër të procedimit penal nr. 390/2023, janë përfunduar hetimet dhe ajo është marrë e pandehur për veprën penale “Falsifikimi i dokumenteve” nga personi që ka për detyrë t’i lëshojë ato.