Paketa Fiskale 2027: Lehtësime dhe taksa të reja për bizneset dhe konsumatorët

Kryeministri Edi Rama prezantoi paketen fiskale dhe buxhetin e shtetit për vitin 2027, duke njoftuar ndryshime në taksimin e produkteve ushqimore, karburanteve, pagave, bizneseve dhe pronave. Ai tha se këto masa synojnë të lehtësojnë kostot e jetesës dhe të rrisin rishpërndarjen e të ardhurave.

Në një komunikim të gjatë publik, Rama tha se për herë të parë buxheti i vitit të ardhshëm do të kalojë pragun e 10 miliardë eurove. Mes ndryshimeve kryesore janë ulja e TVSH-së për 54 produkte bazë ushqimore nga 20% në 6%, heqja e taksës së qarkullimit nga çmimi i naftës, si dhe vendosja e taksave të reja për disa kategori pasurish dhe automjetesh luksoze.

Qeveria propozon uljen e TVSH-së për 54 produkte bazë, mes të cilave mishi, peshku, bulmeti, vezët, mielli, vajrat, sheqeri, makaronat, frutat, perimet dhe ushqimet bazë për foshnjat. Sipas Ramës, kjo masë do t’u lërë familjeve shqiptare rreth 150 milionë euro në vit, të cilat aktualisht paguhen përmes TVSH-së.

Rama njoftoi gjithashtu zgjerimin dhe forcimin e mekanizmit të Pasqyrës së Çmimeve, me qëllim monitorimin e tregut dhe parandalimin e abuzimeve, në mënyrë që ulja e taksës të reflektohet në çmimet për konsumatorët. Për të kompensuar një pjesë të të ardhurave të humbura nga ulja e TVSH-së për ushqimet, qeveria propozon rritjen me një pikë përqindjeje të normës standarde të TVSH-së, nga 20% në 21%.

Ndryshe nga propozimet për ndryshime në disa taksa të tjera, tatimi mbi fitimin e bizneseve do të mbetet në nivelin 15%, sipas njoftimit të Ramës. Ndërkohë, tatimi mbi dividendin do të rritet nga 8% në 15%. Rama e prezantoi këtë masë si një mënyrë për të rritur kontributin e bizneseve të mëdha dhe të pronarëve të tyre, në funksion të financimit të lehtësimeve për familjet me të ardhura më të ulëta.

Paketa parashikon rritjen e pragut të sipërm të tatimit mbi pagat nga 200 mijë në 300 mijë lekë në muaj. Rama argumentoi se rritja ekonomike i krijon qeverisë mundësinë për të ndërmarrë këtë lehtësim, i cili synon të ulë barrën tatimore për një pjesë të punonjësve me paga më të larta.

Një tjetër ndryshim në tatimin mbi të ardhurat personale është vendosja e një pragu të ri për pagat mbi 700 mijë lekë, ku norma e tatimit do të jetë 30%, sipas njoftimit të Ramës. Rama argumentoi se kjo masë synon, ndër të tjera, të kufizojë mundësinë e shmangies së tatimit mbi dividendin përmes deklarimit të të ardhurave si paga.

Qeveria propozon që bizneset me xhiro vjetore mbi 5 milionë lekë të përfshihen në skemën e TVSH-së, duke ulur pragun aktual nga 10 milionë lekë. Sipas Ramës, qëllimi është të kufizohet përdorimi i bizneseve të vogla për të fshehur aktivitetin ose transaksionet e bizneseve më të mëdha.

Ndërkohë, ai përsëriti zotimin se biznesi i vogël do të vijojë të përfitojë nga taksa zero mbi fitimin deri në vitin 2029. Paketa parashikon rritjen e TVSH-së për hotelerinë nga 6% në 10%, ndërsa agroturizmi do të përjashtohet nga kjo rritje. Rama e argumentoi masën me rritjen e të ardhurave të sektorit turistik dhe nevojën për formalizim më të madh të aktivitetit ekonomik.

Kryeministri njoftoi përgatitjen e një sistemi të ri taksimi për ekonominë digjitale, që do të përfshijë si individët që sigurojnë të ardhura përmes rrjeteve sociale, ashtu edhe aktivitetet e tregtisë digjitale. Sipas tij, për këtë qëllim Ministria e Financave po përgatit një projekt të veçantë.

Paralelisht, Rama bëri të ditur se po punohet për masa të tjera që do të synojnë taksimin më të lartë të disa kategorive të pasurisë. Mes tyre përmendi një super-taksë për apartamentet që mbahen bosh dhe nuk jepen me qira, një taksë më të lartë për vilat në bregdet dhe një çmim të shumëfishuar për ujin e pishinave. Këto masa do të trajtohen në një ligj tjetër, ndërsa në paketën fiskale të vitit 2027 do të përfshihet një super-taksë për makinat e luksit.