Qeveria miraton Aktin Normativ për kompensimin e bizneseve të dëmtuara nga protestat e tetorit

Bizneset me qarkullim vjetor deri në 14 milionë lekë do të mund të përfitojnë dëmshpërblim nga shteti për dëmet materiale të shkaktuara gjatë tubimeve të dhunshme të zhvilluara nga 13 deri më 22 tetor 2026. Kompensimi do të mbulojë dëmet që nuk përfshihen në policat e sigurimit, ndërsa shteti do të kërkojë më pas rikuperimin e shumave nga autorët përgjegjës.

Skema synon dëmshpërblimin e plotë të subjekteve që plotësojnë kriteret e përcaktuara, pa ndryshuar kushtet e përgjegjësisë civile të personave që kanë shkaktuar dëmet. Përfitues do të jenë personat fizikë ose juridikë privatë që ushtrojnë aktivitet si biznese apo tatimpagues dhe që kanë pasur një qarkullim deri në 14 milionë lekë, bazuar në deklaratën vjetore të vitit 2025.

Një nga kushtet kryesore është që kompensimi të përfshijë vetëm asetet e pambuluara nga sigurimi. Në rastet kur polica nuk mbulon dëmet e shkaktuara nga trazirat ose i mbulon ato vetëm pjesërisht, shteti do të kompensojë pjesën e pambuluar, sipas rregullave të aktit normativ.

Subjektet e dëmtuara duhet të paraqesin kërkesën pranë administratës tatimore. Pas verifikimit paraprak të dokumentacionit, dosja do t’i përcillet Ministrisë së Ekonomisë dhe Inovacionit. Më pas, ministria do t’i kërkojë Policisë së Shtetit të verifikojë, brenda 30 ditëve, nëse dëmi është shkaktuar gjatë tubimeve të dhunshme dhe nga protestuesit.

Në rast se dëmi konfirmohet, ministria do të miratojë kërkesën dhe do të kryejë kalimin e shumës në llogarinë bankare të subjektit brenda 30 ditëve nga përfundimi i procesit të evidentimit. Një element i rëndësishëm i skemës është se kompensimi do të kryhet edhe në rastet kur nuk është identifikuar ende personi që ka shkaktuar dëmin apo organizata që ka organizuar tubimin e dhunshëm.

Shteti do të kërkojë kthimin e parave nga autorët. Akti normativ parashikon gjithashtu mekanizmin përmes të cilit shteti do të kërkojë rikuperimin e shumave të paguara për kompensimin e bizneseve të dëmtuara. Pas kryerjes së pagesës, shtetit i lind e drejta ligjore për t’iu drejtuar personit përgjegjës për kthimin e shumës së paguar.

Në këtë proces do të angazhohet Avokatura e Shtetit, e cila fillimisht do t’u kërkojë autorëve kthimin vullnetar të parave brenda 30 ditëve. Nëse shuma nuk kthehet brenda këtij afati, Avokatura mund të ngrejë padi civile për regres. Padia mund të drejtohet ndaj personave të identifikuar si shkaktues të dëmit, si dhe ndaj personit juridik ose organizatës që ka organizuar protestën apo tubimin e dhunshëm, në rastet kur plotësohen kushtet ligjore për përgjegjësi solidare.

Për dëmet e shkaktuara nga të miturit ose personat që nuk kanë zotësi për të vepruar, akti parashikon përgjegjësinë financiare të prindërve ose kujdestarëve ligjorë, sipas dispozitave përkatëse. Parashikohen edhe gjoba për personat e arrestuar. Përveç skemës së kompensimit dhe mekanizmit të rikuperimit të dëmeve, akti normativ parashikon edhe masa administrative për personat e arrestuar ligjërisht gjatë tubimeve në fjalë.