BE-ja ndalohet të ofrojë Kanadasë statusin e "anëtarit të asociuar"

Vendet anëtare të Bashkimit Evropian kanë kundërshtuar propozimin për t’i dhënë Kanadasë statusin e “anëtarit të asociuar”, duke orientuar marrëveshjen drejt një formulimi më të butë që parashikon forcimin e bashkëpunimit mes dy palëve.

Sipas draftit të fundit të deklaratës së përbashkët BE-Kanada, një grup shtetesh anëtare, përfshirë Gjermaninë, Francën dhe Greqinë, kanë kundërshtuar përdorimin e termit “anëtar i asociuar”. Dokumenti pritet të publikohet në kuadër të Samitit BE-Kanada në Montreal.

Propozimi fillestar ishte paraqitur nga presidentja e Komisionit Evropian, Ursula von der Leyen, në fjalimin e saj për Gjendjen e Unionit në shtator, ku ajo sugjeroi që Kanadasë t’i jepej një status i veçantë në marrëdhëniet me BE-në. Ideja shkaktoi habi te disa prej shteteve anëtare.

Në një version të mëparshëm të deklaratës, të dyja palët parashikonin të punonin deri në Samitin BE-Kanada të vitit 2027 për të përcaktuar konceptin e “anëtarësimit të asociuar”. Ky mekanizëm synonte të forconte bashkëpunimin në fushat e prosperitetit, sigurisë ekonomike dhe autonomisë strategjike.

Megjithatë, në draftin më të fundit, kjo referencë është zëvendësuar me angazhimin për të krijuar një lidhje edhe më të ngushtë mes Kanadasë dhe Bashkimit Evropian, si dhe për të përcaktuar deri në vitin 2027 kuptimin e një “shoqërimi gjithnjë e më të ngushtë”, pa iu referuar anëtarësimit të plotë.

Teksti ende nuk ka marrë miratimin përfundimtar.

Pavarësisht kundërshtimeve për terminologjinë, Brukseli synon të zgjerojë ndjeshëm bashkëpunimin me Kanadanë, në një kohë kur të dyja palët kërkojnë të forcojnë lidhjet në fushën ekonomike dhe të sigurisë.

Nga ana e tij, kryeministri kanadez Mark Carney u shpreh të martën se emërtimi i marrëdhënies nuk është thelbësor. “Lajmi i mirë është se emrat ose terminologjia specifike nuk kanë rëndësi”, deklaroi ai, duke shtuar se ajo që ka vërtet rëndësi është ndikimi që marrëveshja do të ketë në jetën e qytetarëve kanadezë.