Vuçiç ishte pranë organizimit të një grushti shteti, por hoqi dorë pas telefonatave evropiane

Presidenti serb Aleksandar Vuçiç ishte pranë organizimit të një grushti shteti për të ruajtur pushtetin, por hoqi dorë pas telefonatave paralajmëruese nga qeveritë evropiane. Kjo pretendohet nga burime të cituara nga gazeta britanike The Times, sipas të cilave kreu i shtetit serb ishte pranë organizimit të një grushti shteti për të qëndruar në pushtet.

Politikanë dhe një ish-zyrtar i lartë i policisë, të cilët kanë folur për gazetën, pretendonin se Vuçiç ishte i vendosur të ruante pushtetin pas 12 vitesh në krye të vendit. Megjithatë, ai ndryshoi qëndrim kur u bë e qartë se Lista e Studentëve kishte fituar rreth 500 mijë vota më shumë në zgjedhjet parlamentare, si dhe pas telefonatave paralajmëruese që i kërkonin të mos përpiqej të vinte në dyshim rezultatin.

" Ai dërgoi 4 mijë efektivë policie dhe 3 mijë persona të dhunshëm në qendër të Beogradit të dielën, për të mbrojtur regjimin. Jam 100% i sigurt se ai kishte planifikuar të refuzonte njohjen e rezultateve", deklaroi Spasoje Vuleviç, ish-komandant i Njesisë Speciale Antiterroriste të Serbisë (SAJ).

Edhe Sandro Goci, anëtar i Parlamentit Europian dhe president i Partisë Demokratike Europiane, tha se gjatë ditës së zgjedhjeve ishin marrë informacione shqetësuese.

" Të dielën morëm raportime alarmante nga burime diplomatike se Vuçiç ishte gati të luftonte dhe të kryente një grusht shteti", u shpreh Goci.

Radomir Saiçiç, një prej kandidatëve kryesorë të Listës së Studentëve, i cili pritet të marrë një post të rëndësishëm në qeverinë e ardhshme serbe, pretendon gjithashtu se Vuçiç kishte planifikuar të përdorte dhunën, por ndryshoi mendje në momentin e fundit.

"Ata kishin një plan për të përdorur forcat brutale për të zhvlerësuar vullnetin e votuesve, nëse rezultati do të ishte i ngushtë. Por kam informacion se ai mori shumë telefonata nga policia dhe qarqe të tjera, të cilat e shtynën të ndryshonte mendje. Ata e bindën se zbatimi i këtij plani do të përfundonte shumë keq për të", tha Saiçiç.

Saiçiç pretendon gjithashtu se një ish-punonjës policie, i cili kishte paralajmëruar kolegët e tij të mos rrihnin apo qëllonin protestuesit, kishte marrë një kërkesë anonim me mesazhin: "Plumbi i parë është për ty".