Eva Pango: “Nuk mund ta marrim këtë si një shkëputje nga revolta popullore”

Eva Pango, një protestuese shqiptare, tregon për përvojën e saj të dhunshme gjatë protestës në Tiranë. Ajo u godit me një granatë lotsjellëse cilindrike dhe u la me gjak në shesh.

“Unë nuk kam bërë kurrë as hedhje guri, as hedhje granatash. Nuk e kam për natyrë, unë në natyrë kam retorikën”, u shpreh Eva Pango.

Pango tregon se stafi mjekësor bëri maksimumin për ta shënuar, por flet dhe për problematikat e bluzave të bardha me mangësitë që kishin.

“Nuk mund të mohoj stafin se si janë sjellë. Sistemi me difiçitet e veta është tjetër gjë, njerëzit janë tjetër gjë. Reanimacioni ishte në gjendje shumë të keqe, kam qëndruar 3 ditë aty u gëzova që dola në pavion. Ishte shumë problematik. Kishte vetëm një maskë oksigjeni dhe e aklonin dorë më dorë. Hiqja Lenën dhe vërja Prenës, shumë e rëndë, tjetri mund të vdesë kur ia heq oksigjenin. Pacientët duke vdekur në reanimacion te muri bëheshin punime, unë e kisha kafkën e hapur e dëgjoja”, u shpreh Pango.

Pango flet edhe për forma të tjera protestash dhe për mënyrat në të cilat protestuesit janë shënjestruar.

“Revolucion është fjalë e madhe, por jemi në kufijtë e një revolucioni. Çdo shpërthim pakënaqësie është akumulim i një momenti të caktuar. Ndonjëherë kur kalon ai momenti zor se përsëritet më. E tillë ishte protesta e studentëve, ishte momenti për ndryshim të madh u shua me lloj sabotimesh, të brendshme, të jashtme, fjeti për ca vite dhe ja ku jemi sërish. U rindez sërish. Nuk mund ta marrim këtë si një shkëputje nga revolta popullore”, u shpreh Eva Pango.

Pango është e motivuar dhe nuk do të heq dorë nga protestat.

“Unë nuk do të heq dorë, nuk është se kam dale nga spitali më e thyer dhe më e rënë. Kam dale më e motivuar kur pashë se sa mbështetje dhe solidaritet kam marrë”, u shpreh protestuesja.

Pango është e siguruar se protestuesit do të dalin më të motivuar dhe se dhuna nuk do të funksionojë.

“Nuk të bën më përshtypje gjë dhe shumë protestues që janë rrahur dhe janë rrahur do të dalin më të motivuar, sepse kur kanë provuar dhe drurin thonë se s’kemi për të humbur gjë. Nuk funksionon me dhunë me shqiptarët, ta harrojnë sepse do u kthehet mbrapsht. Në spital shpresoj të mos kthehem më kurrë, në protestë do kthehem që çke me të”, u shpreh Eva Pango.