Dëmet e bizneseve nga protestat arrijnë në 3.37 milionë euro, 110 aplikime te Tatimet

Dëmet e deklaruara nga bizneset e prekura gjatë protestave kanë arritur në 3.37 milionë euro, sipas të dhënave të publikuara nga Drejtoria e Përgjithshme e Tatimeve. Deri tani, përmes shërbimit “Dëmi im” në portalin e-Albania janë regjistruar 110 aplikime nga biznese që kanë raportuar dëme të shkaktuara në njësitë e tyre tregtare. Administrata Tatimore bej të dihet se procesi i evidentimit, dokumentimit dhe vlerësimi i dëmeve vijon, ndërsa u ka bërë thirrje bizneseve të prekura që të raportojnë çdo dëmtim përmes shërbimit të dedikuar online. Sipas Tatimeve, shërbimi “Dëmi im” u mundëson subjekteve të paraqesin informacionin mbi dëmet e pësuar, me qëllim dokumentimin dhe vlerësimin e tyre nga institucionet përgjegjëse. Vlera prej 3.37 milionë eurosh përfaqëson shumën e dëmeve të deklaruara deri tani nga bizneset dhe jo domosdoshmërisht vlerën përfundimtare të verifikuar nga administrata. Dëmet janë shkaktuara gjatë protestave të studentëve, të cilat janë shoqëruar edhe me dëmtime materiale në një pjesë të njësive tregtare.