Skenarët e mundshëm pas zgjedhjeve në Izrael

Zgjedhjet që u mbajtën në Izrael nuk prodhuan një fitues të qartë për të formuar Qeverinë. Kryeministri i Izraelit, Benjamin Netanyahu, mbetet në postin e tij, por përballet me një Parlament ku opozita synon që ta rrëzojë atë nga pushteti. Presidenti i Izraelit, Isaac Herzog, do të nisë konsultimet me përfaqësuesit e partive dhe më pas me kandidatët që ai vlerëson se mund të kenë shanset më të mira për të formuar Qeverinë. Nëse kandidati dështon ta formojë ekzekutivin, një tjetër mund ta provojë dhe nëse ai dështon, Knasset-i apo Parlamenti izraelit mund ta nominojë një kandidat tjetër. Afati për këtë proces është rreth 100 ditë. Nëse asnjë kandidat nuk arrin ta formojë Qeverinë, atëherë mbahen zgjedhjet e reja. Presidenti Herzog tha se duhet të bëhet gjithçka për të shmangur zgjedhjet e reja dhe u bëri thirrje partive që të shkojnë në konsultime me të me mendje të hapur.