Tre protestues të padisinin kryeministrin Edi Rama për shpifje dhe fyerje

Tre protestues kanë paraqitur në Gjykatën e Shkallës së Parë të Juridiksionit të Përgjithshëm Tiranë një kërkesë për gjykim penal ndaj kryeministrit Edi Rama, duke e akuzuar për fyerje dhe shpifje. Kërkesa lidhet me një video të publikuar më 23 tetor 2026 në faqen zyrtare të kryeministrit në Facebook, në të cilën ai shfaqi fotografi të 45 personave që i lidhi me protestat, duke i shoqëruar me iniciale, moshë dhe pretendime për precedentë penalë.

Rama pretendoi se mes tyre kishte persona të dënuar ose nën hetim për vrasje, vjedhje, dhunë në familje, trafik narkotikësh, dhunë seksuale dhe trafik njerëzish, dhe disa prej tyre i lidhi me financim nga Irani. Ai tha se përgatitjet për dhunën kishin nisur muaj më parë, gjatë protestave për Zvërnecin, dhe se lëndë eksplozive e maska ishin sjellë nga jashtë. Kryeministri i përshkroi protestuesit si persona të radikalizuar, pjesë e rrjetit Antifa, të cilin e quajti “rrjet terrorist urban”, dhe të financuar nga krimi i organizuar dhe forca të huaja. “Këta nuk janë studentë”, tha ai.

Një nga personat e shfaqur në video ishte 20-vjeçari Joni Sinoymeri, student i Fakultetit të Mjekësisë. Rama e paraqiti me inicialet J.S., me sytë të mbuluar dhe me mbishkrimin “Student? Jo!”, duke pretenduar se kishte precedent penal për prodhim dhe shitje të lëndëve narkotike. Po atë ditë, Sinoymeri doli publikisht në protestë, hoqi maskën para kamerave dhe mohoi akuzat. Ai deklaroi se nuk ka precedent penal dhe se ka mesatare 10 në studime.

Mes personave të shfaqur në video ishin edhe Erion Vrioni, Adgert Fejza dhe Beonard Prençi, të cilët kërkojnë tani ndjekjen penale të Ramës për fyerje dhe shpifje, vepra të parashikuara nga nenet 119 dhe 120 të Kodit Penal. Sipas kërkesës, deklaratat e kryeministrit u kanë cenuar reputacionin dhe dinjitetin, duke i paraqitur para publikut si persona me të kaluar kriminale ose të përfshirë në veprimtari të paligjshme. Ata i kërkojnë gjykatës të shqyrtojë materialin audioviziv dhe të vlerësojë përgjegjësinë penale të kryeministrit.

Erion Vrioni, njëkohësisht protestues dhe akuzues, thotë se akuzat kanë ndikuar edhe në marrëdhëniet me njerëzit që e njohin. “Akuzat që na kanë ngritur janë aq shumë qesharake, saqë edhe gjithë njerëzit që na njohin po na vënë në dyshim: a jemi mirë mendërisht ne apo ai. Akuzat që na kanë ngritur janë mashtrim dhe fshehje e të ardhurave, duke më kapur në makinë 10 ujë fiziologjik, maska Covid-i, gjashtë fasha, një biçak të vogël dhe një palë dorëza”, thotë Vrioni.

Për 38-vjeçarin Adgert Fejza, më fyese është lidhja e emrit të tij me vjedhjen. “Përtej shpifjes që është bërë atje, na kanë nxjerrë për hajdutë, prandaj jam sot këtu për ta ndjekur këtë çështje. Mendoj që mund të thotë çfarë të dojë, edhe po e pranojmë deri diku, por vjedhje unë nuk kam bërë një jetë të tërë dhe është diçka shumë ofenduese, sidomos nga një person i rangut të lartë siç është zoti kryeministër”, thotë Fejza.

Ky nuk është rasti i parë kur kryeministri publikon të dhëna penale për protestues. Në qershor, Rama publikoi në Facebook foton e një protestuesi dhe i renditi tetë procedime. Ai protestues paralajmëroi nga podiumi i protestës se do ta padiste për shpifje. Deklaratat e 23 tetorit erdhën kur masiviteti i protestave nëpër Shqipëri kishte rënë, pas dhunës policore, arrestimeve dhe procedimeve penale ndaj protestuesve.