Gjykata e Lartë cakton datën për gjyqin e Saimir Tahirit

Gjykata e Lartë ka caktuar datën 10 dhjetor për shqyrtimin e çështjes së ish-ministrit të Brendshëm, Saimir Tahiri. Relator i çështjes do të jetë gjyqtari Enton Dhimitri. Tahiri është drejtuar Gjykatës së Lartë duke kërkuar pafajësinë, ndërsa Prokuroria e Posaçme (SPAK) ka bërë gjithashtu rekurs, pasi nuk është pajtuar me dënimin e tij vetëm për veprën penale të shpërdorimit të detyrës.

SPAK kërkon që ish-ministri të dënohet edhe për trafik narkotikësh në kuadër të grupit të strukturuar kriminal, duke kërkuar një dënim prej 12 vitesh burg. Të dyja palët i kanë paraqitur rekurset në vitin 2022.

Kujtojmë se Gjykata e Posaçme e Apelit e dënoi Tahirin me 5 vite burg për shpërdorim detyre, dënim që për shkak të gjykimit të shkurtuar u reduktua në 3 vite e 4 muaj. Pas një periudhe në burg, ish-ministri u lirua me vendim të Gjykatës së Elbasanit, pa e përfunduar të gjithë dënimin, për shkak të rrethanave familjare.

Tashmë, Gjykata e Lartë pret të shqyrtojë rekurset e të dyja palëve, të cilat kërkojnë vendime të kundërta: Tahiri pafajësinë, ndërsa SPAK një dënim më të rendë.