Taulant Balla takohet me Begajn, opozita bojkoton konsultimet për datën e votimit

Taulant Balla, kryetari i Grupit Parlamentar të Partisë Socialiste, ka takuar Presidentin Bajram Begaj për të diskutuar mbi datën e zgjedhjeve lokale të vitit 2027. Takimi vjen pas ftesës së Presidentit drejtuar partive politike për të diskutuar mbi datën e zgjedhjeve të ardhshme vendore. Ndërkohë, PD dhe partitë e tjera opozitare kanë refuzuar të marrin pjesë në konsultimet për datën e zgjedhjeve. Kreu i Grupit Parlamentar të PD-së, Gazment Bardhi, e ka cilësuar procesin si një teatër politik, duke paralajmëruar se opozita nuk do t'i përgjigjet pozitivisht ftesës së Presidentit. Sipas Kodit Zgjedhor, Presidenti duhet të shpallë datën e zgjedhjeve nëntë muaj para përfundimit të mandatit të kryetarëve aktualë të bashkive. Afati për percaktimin e datës përllogaritet të jetë 6 nëntori, ndërsa votimi duhet të zhvillohet në një të diel mes 15 prillit dhe 15 majit 2027. Deri më tani nuk ka një datë zyrtare të konfirmuar, por muaji maj shihet si periudha më e mundshme për mbajtjen e zgjedhjeve.