Ermal Gjinaj, një biznesmen i lidhur me Ogerta Manastirliun, është sekuestruar nga BKH për të mbrojtur një dosje të dyshuar korrupsioni.

Manastirliu, ish-ministrja e shëndetësisë, është nën pyetje për një skemë të dyshuar korrupsioni që mund të prekë drejtpërdrejt familjen e saj.

Sekuestrimi i telefonit të Gjinajt është kryer nga BKH, në kuadër të hetimeve të drejtuara nga prokurorja Dorina Bejko.

Një prej marrëdhënieve që po verifikohet është kontrata e biznesit mes Gjinajt dhe kompanisë koncesionare të sterilizimit, ndërsa në raportimet për dosjen përmendet edhe një skemë e dyshuar korrupsioni dhe pastrimi parash përmes faturave fiktive.

Në këtë histori ka edhe një fakt tjetër që vendos Manastirliun përballë pyetjeve të reja. Më 15 janar 2020, kur ajo drejtonte Ministrinë e Shëndetësisë, u amendua kontrata e koncesionit të sterilizimit me kompaninë SaniService. Marrëveshja, e firmosur në emër të ministrisë nga sekretari i përgjithshëm Geraldina Prodani, ndryshonte kushtet financiare për shërbimet përtej kufirit vjetor të ndërrimit, duke parashikuar ulje të cmimit me 25%.

Manastirliu e mbrojti publikisht këtë ndryshim si masë për uljen e kostove. Tashmë, kur SPAK po verifikon marrëdhënien e biznesit të bashkëshortit të saj me koncesionarin, merr rëndësi të vëçantë koha kur është lidhur kontrata private, vlera e saj dhe shërbimet për të cilat është paguar Gjinaj.

Sipas dyshimeve të publikuara, kompani farmaceutike janë favorizuar me kontrata dhe fonde shtetërore, ndërsa një pjesë e përfitimeve mund të jetë kaluar bashkëshortit të ministres për shërbime që nuk janë kryer. Nëse kjo skemë provohet, Gjinaj do të rezultonte hallka financiare mes bizneseve që merrnin paratë publike dhe familjes së zyrtarës që drejtonte sektorin.

Manastirliu nuk mund të shmanget përgjegjësisë politike për mënyrën se si u administruan këto fonde. Gjatë mandatit të saj, Ministria e Shëndetësisë zhvilloi prokurime të mëdha, përfshirë kontratat emergjente të pandemisë COVID-19, tenderet sekretë dhe blerjet e përqendruara të barnave dhe pajisjeve mjekësore. Këto procedura u shoqëruan me kallëzime dhe kërkesa për hetim mbi përdorimin e parave të buxhetit.

Mes kompanive që kanë përfituar kontrata furnizimi gjatë kësaj periudhe figurojnë Megapharma, Edna Farma, Aldosch Farma etj. Një tjetër emër i rëndësishëm në tregun farmaceutik është Delta Holding, grupi i kontrolluar nga Dorian Sadiku, që zotëron Delta Pharma.

Në dhjetor 2023, agjentët e BKH-së kontrolluan zyrat e Delta Pharma, Avicena dhe rrjetit të farmacive Ditë e Një, në kuadër të hetimeve për marrëdhënie të dyshuara financiare të ish-ministrit Ilir Beqaj me bizneset private. Këto hetime janë ndjekur edhe nga prokurorja Dorina Bejko, e cila tani drejton veprimet në çështjen ku është sekuestruar telefoni i Gjinajt.

Në sektorin e laboratorëve del edhe Genius Lab, kompani e lidhur me biznesmenin Besnik Çullhaj, e cila ka përfituar kontrata publike në shëndetësi. Në ambientet e saj BKH ka ushtruar kontroll në fund të vitit 2025, disa muaj para veprimeve ndaj Gjinajt. Këto janë hetime të vëçanta dhe nuk ka ende prova që të provojnë përfshirjen e këtyre kompanive në pagesat e dyshuara ndaj bashkëshortit të Manastirliut.

Ndërkohë, Ermal Gjinaj ka mbajtur edhe postin e drejtorit në OSHEE, gjatë periudhës kur institucioni drejtohej nga Adrian Çela. Pas largimit nga ky funksion në vitin 2020, bashkëshorti i Manastirliut nisi të deklaronte të ardhura prej 40-50 mijë eurosh në vit, duke arritur në rreth 200 mijë euro gjatë periudhës 2021–2025. Këto të ardhura marrin rëndësi të vëçantë përballë hetimeve mbi kontratat private dhe pagesat e dyshuara nga bizneset e shëndetësisë.

Një pjesë e këtij artikulli është marrë nga Pamfleti.