Sondazhet në SHBA: Demokratët në avantazh 4 ditë para zgjedhjeve të mesmandatit

Vetëm katër ditë para zgjedhjeve të mesmandatit në Shtetet e Bashkuara, demokratët rezultojnë në avantazh në sondazhet kombëtare, ndërsa presidenti Donald Trump përballet me rënien e mbështetjes publike. Sipas dhënave të publikuara nga RealClearPolling, demokratët kryesojnë me 51.4% të mbështetjes, ndërsa republikanët renditen me 43.2%. Rezultatet pasqyrojnë një klimë elektorale të ndikuar nga pakënaqësia e qytetarëve për gjendjen ekonomike dhe rënien e vlerësimit për administratën Trump.

Një tjetër tregues i dobësimit të mbështetjes për presidentin vjen nga sondazhi i Universitetit Marquette. Sipas rezultateve, vetëm 37% e amerikanëve miraton mënyrën se si Trump po ushtron detyrën, ndërsa 61% shprehin kundër performancës së tij në Shtëpinë e Bardhë.

Ekonomia dhe vëçanërisht rritja e kostos së jetës mbeten ndër shqetësimet kryesore të votuesve amerikanë. Cmimet e ushqimeve dhe vështirësitë financiare të familjeve po ndikojnë në perceptimin e qytetarëve për drejtimin ekonomik të vendit.

Në disa shtete ku gara elektorale pritet të jetë vendimtare, demokratët shfaqen gjithashtu në avantazh. Në Teksas dhe Michigan, kandidatët e kësaj force politike kryesojnë në sondazhe, megjithëse diferencat nuk e bëjnë rezultatin përfundimtar të parashikueshëm.

Në përpjekje për të mobilizuar elektoratin republikan, Donald Trump ka zhvilluar takime elektorale në Karolinën e Jugut, ndërsa zëvendëspresidenti JD Vance është angazhuar në fushatë në Teksas.

Nga ana tjetër, demokratët kanë vënë në lëvizje figura të njohura të partisë për të forcuar mbështetjen ndaj kandidatëve të tyre. Mes tyre janë ish-presidenti Barack Obama dhe ish-zëvendëspresidentja Kamala Harris, të cilët po marrin pjesë në aktivitetet elektorale në mbështetje të kandidatëve demokratë.

Zgjedhjet e mesmandatit konsiderohen një provë e rendësishme për administratën Trump, pasi rezultati do të përcaktojë balancat politike në Kongres dhe hapësirën që do të ketë presidenti për të çuar përpara agjendën e tij gjatë pjesës së mbetur të mandatit.