Arrestohen 4 persona në Shkodër për trafikimin e kanabisit dhe sekuestrohen 56.7 kg lëndë e dyshuar narkotike

Policia e Shkodrës ka arrestuar katër persona për trafikimin e kanabisit dhe sekuestrohet 56.7 kg lëndë e dyshuar narkotike. Të arrestuarit janë identifikuar si Petrit Frroku, Kole Kondari, Ded Nimani dhe Martin Prendi. Nga hetimet, dyshohet se ata transportonin lëndë narkotike me automjete dhe me varka në zonë të pyllëzuar në fshatin Koman.

Operacioni i policisë u realizua në kuadër të një pune hetimore disajavore, me metoda proaktive. Sekuestrohet lëndë e dyshuar narkotike Cannabis Sativa, e ndarë në 10 thasë. Të arrestuarit janë vënë në pranga dhe vëllai i njërit prej tyre është proceduar në gjendje të lirë.

Gjatë ndërhyrjes në këtë zonë, shërbimet e Policisë kryen kontroll në një ambient të përshtatur për kamping, në pronësi të shtetasit P. F., dhe në automjetet në përdorim të shtetasve K. K. dhe M. P., ku gjetën 10 thasë me lëndë të dyshuar narkotike Cannabis Sativa, me peshë mbi 56.7 kilogramë, të cilët u sekuestruan në cilësinë e provës materiale.

Vijon puna për dokumentimin e kësaj veprimtarie kriminale dhe identifikimin e shtetasve të tjerë që mund të jenë të përfshirë. Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.