Fluturimi i Air Force One mbi Shtëpinë e Bardhë shkaktoi vonesa në 202 fluturime në Uashington
Fluturimi i ulët i Air Force One mbi Shtëpinë e Bardhë për Halloween shkaktoi vonesa në 202 fluturime në Uashington, pasi Administrata Federale e Aviacionit (FAA) u detyrua të mbyllte përkohësisht Aeroportin Kombëtar Reagan.
Fluturimi i ulët i Air Force One mbi Shtëpinë e Bardhë për Halloween shkaktoi vonesa në 202 fluturime në Uashington, pasi Administrata Federale e Aviacionit (FAA) u detyrua të mbyllte përkohësisht Aeroportin Kombëtar Reagan.
Fluturimi i avionit presidencial amerikan u realizua në kohën kur presidenti amerikan, Donald Trump, organizonte një festë për fëmijët në Shtëpinë e Bardhë. Pamjet e avionit duke kaluar mbi rezidencën presidenciale u publikuan edhe në rrjetet sociale nga vetë Shtëpia e Bardhë, e cila e cilësoi atë si një fluturim spektakolar për fëmijët që merrnin pjesë në aktivitetin e Halloweenit.
Megjithatë, spektakli ajror shkaktoi shqetësime dhe pakënaqësi në Uashington, pasi FAA u detyrua të mbyllte përkohësisht Aeroportin Kombëtar Reagan, një nga aeroportet kryesore të kryeqytetit amerikan.
Sipas raportimeve, njoftimi për fluturimin iu komunikua autoriteteve lokale, aeroportit dhe banorëve vetëm 15 minuta përpara se ai të realizohej. Edhe kompanitë ajrore thanë se kishin marrë informacion më pak se një orë para ngjarjes.
Këshilli i Qytetit të Distriktit të Kolumbias reagoi përmes një postimi në rrjetet sociale, duke kritikuar njoftimin e vonuar. Sipas tij, paralajmërimi i shkurtër i habiti shumë persona, përfshirë edhe vetë anëtarët e këshillit.
Ndërkohë, disa pasagjerë raportuan se avionët me të cilët po udhëtonin drejt Uashingtonit u detyruan të ndryshonin itinerarin ose të qëndronin në ajër në pritje të rifillimit të operacioneve normale.
Sipas të dhënave të faqes FlightAware, 26% e fluturimeve në nisje dhe 17% e atyre në mbërritje pësuan vonesa, me një total prej 202 fluturimesh të prekura. Pjesa më e madhe e tyre lidhej me ndërprerjen e përkohshme të aktivitetit në aeroport.
Fluturimet e Air Force One mbi zona të ndryshme të vendit nuk janë të pazakonta gjatë aktiviteteve ku merr pjesë Donald Trump, veçanërisht në ngjarje të mëdha sportive. Megjithatë, këtë herë kalimi i avionit presidencial mbi Shtëpinë e Bardhë për Halloween solli edhe pasoja në trafikun ajror të kryeqytetit amerikan.