Meta: Bashkim Zeneli, modeli i denjë i politikanit largpamës
Kryetari i Partisë së Lirisë, Ilir Meta, ka bërë një reagim nga burgu për ndarjen nga jeta të ish-deputetit dhe ish-ambasadorit Bashkim Zeneli. Meta e vlerëson kontributin e Zenelit për ndërtimin dhe konsolidimin e një politike jashtme afatgjatë të Shqipërisë, orientuar qartë drejt anëtarësimit në NATO dhe Bashkimin Europian.
Me trishtim të thellë mësova lajmin për ndarjen e parakohshme nga jeta të personalitetit të shquar të diplomacisë, politikës, gazetarisë dhe publicistikës shqiptare, Bashkim Zeneli. Ishte kaq e njohur dhe e respektuar figura në Shqipëri dhe jashtë saj, që ka qenë një model i denjë i politikanit largpamës dhe urtë.
Bashkim Zeneli përfaqësoi modelin e denjë të politikanit të urtë dhe largpamës, të reformave dhe orientimit të qartë euro-atlantik të Shqipërisë, por edhe diplomatin që dinte të jepte prioritet forcimit të gjithanshëm të bashkëpunimit me fqinjët. Politikan i përkushtuar për çështjen kombëtare dhe sidomos mbështetës i palodhur i lëvizjes çlirimtare të Kosovës.
Angazhimi i tij i vyer si ambasador në Gjermani gjatë krizës së Kosovës do të mbetet i veçantë dhe i jashtëzakonshëm në shërbim të kësaj çështjeje madhore kombëtare. Kjo është një humbje e madhe, jo vetëm për familjen e dashur dhe të mrekullueshme Zeneli, por për të gjithë miqtë, ata që e njohën nga afër dhe bashkëpunuan me të.
Ngushëllimet më të ndjera për Zonjën Engjëllushe (Lushin), vajzat e tij Valbona dhe Rudina, si dhe për të gjithë afërmit dhe bashkëpunëtorët e tij të shumë jo vetëm në tokën shqiptare, por kudo në Evropë dhe botë.
Kontributi i tij për ndërtimin dhe konsolidimin e një politike jashtme afatgjatë të Shqipërisë, të orientuar qartë drejt anëtarësimit në NATO dhe Bashkimin Europian, si dhe për forcimin e pandërprerë të fqinjësisë së mirë, do të mbetet gjithmonë një vlerë dhe trashëgimi i vyer për të gjithë diplomatët e rinj shqiptarë.