Katër shqiptarë të dënuar për vjedhjet në banesa në Londër

Katër shqiptarë janë dënuar me burg në Angli pasi detektivët e Policisë Metropolitane përdorën të dhënat në kartat e tyre të udhëtimeve urbane për të bërë lidhjen mes tyre me një seri vjedhjesh në disa banesa në Londër. Çlirim Ferizi, 26 vjeç, u dënua me dy vjet burg në Gjykatën Mbretërore të Isleworth të enjten, më 20 gusht. Bashkëpunëtori i tij, Oresti Saliaj, 40 vjeç, ishte dënuar më parë me tre vjet e gjashtë muaj burg, të mërkurën, më 22 prill, në të njëjtën gjykatë. Sipas Policisë Metropolitane, detektivët nisën hetimet pas një vjedhjeje në një banesë në Ruislip, në muajin shkurt. Përmes shqyrtimit të gjerë të pamjeve të kamerave të sigurisë, provave forenzike dhe analizimit të të dhënave të telefonave celularë dhe kartave Oyster të udhëtimit, efektivët arritën t’i lidhnin dy personat me disa vjedhje të tjera. Hetimet zbuluan se ata kishin shënjestruar qëllimisht banesat e familjeve nga komuniteti i Azisë Jugore, duke besuar se aty do të gjenin bizhuteri dhe sende të tjera me vlerë të lartë.