Drejtori i policisë së burgut: Nuk ka “hoteli” në qeli, por takime speciale janë bërë
Deputeti Erald Kapri ka pyetur drejtesen e policisë së burgut për transferimin e Erion Veliaj në burgun e Fierit dhe për takimet speciale mes të burgosurit me rrezikshmëri të lartë dhe partneren e tij. Drejtori i policisë së burgut ka thënë se takimet speciale janë bërë, por nuk janë regjistruar dhe se nuk ka pasur një hetim për pretendimet për takime të tilla.
Deputeti i Partisë Mundësia, Erald Kapri, i është drejtuar sot me disa pyetje drejtoreshës së përgjithshme të Burgjeve, në seancën e komisionit të posaçëm parlamentar për çështjet e brendshme. Ai u ndal te transferimi i Erion Veliajt në burgun e Fierit dhe procedurat e ndjekura për këtë rast. Për këtë, ajo iu përgjigj duke i thënë se duhet të bëjë një kërkesë me shkrim dhe aty do të marrë përgjigje zyrtare.
“Ju mund të drejtoni kërkesë zyrtare dhe do merrni përgjigje për pikat tuaja në mënyrë shteruese”, tha ajo. Ai e ka pyetur në lidhje me aludimet se në burg janë bërë takime speciale mes një të burgosuri me rrezikshmëri të lartë me partneren e tij, që nuk janë regjistruar, dhe nëse ka pasur një hetim për një pretendim të tillë.
Po ashtu ai ka pyetur edhe nëse në burgun e Peqinit, ekziston një “hotel” brenda burgut, por për këto dy pyetje të fundit, ajo ia kaloi fjalën drejtorit të policisë së burgjeve, Paulin Rajta, pasi tha se gjatë kësaj kohe nuk ka qenë në krye të këtij institucioni.
“Ka pasur takime, jo te dhomat speciale, por të dhomat e takimit, por dhe aty nuk duhej ta fusnin… kanë qenë i burgosuri dhe partnerja e tij që e ka dhe sot. Ligji ka hapësira, dhe mundohen t’i shfrytëzojnë”, tha ai.
“Sa i takon çështjes në lidhje me qarkullimin e videos për një personazh të krimit me kushte ekstra në qeli… tani IA është problem i madh, ka pasur ca po jo të gjitha, ca janë të rregulluara, ka pasur disa pajisje, por nuk ka pasur pajisje të ndaluara por sende të tepërta.
Për krimet e rënda të dënuara me mbi 15 vjet, edhe bota në një farë mënyre e lejon, dhe thotë që ka të drejtë ta personalizojë qelinë sepse do kalojë shumë vite aty, edhe pse ne nuk jemi në këto kushte….. Por si reagoi policia? Merrni dhe këtë vlerë. A fuqi që kjo polici të reagojë? Reagoi.
Dhe ajo nuk ekziston më, kur ka dalë në media, ajo nuk ka qenë, por ka dalë më vonë në media. Ju garantoj që të gjithë vuajnë dënimin ashtu siç ka marrë vendim gjykata, dhe pavarësisht se mund të shikoni ndonjë send të tepërt apo të ndaluar, burgu është burg… se mos marrin vesh këta të rinjtë dhe thonë është gallatë atje, jo”, tha drejtori i policisë së burgjeve.