"Partizani" dhe deklarata e Mediut dhe 3 dëshmitarëve të thirrur nga GJKKO: "S'ka asnjë lidhje me pronën"

GJKKO vazhdon me dëshmitë për dosjen "Partizani". Në procesin e zhvilluar këtë të hënë, Justina Boriçi, Fatmir Mediu dhe Vladimir Qirjazi deklaruan se nuk kishin asnjë lidhje me pronën e klubit.

Justina Boriçi, ish-drejtoreshë e kthimit dhe kompensimit të pronave, deklaroi se emërimi i saj në këtë detyrë ishte bërë nga ish-kryeministri Sali Berisha, pa pasur diskutime paraprake për çështjen që është objekt i gjykimit. Ajo tha se nuk ishte njohur me asnjë ankesë lidhur me pronat në fjalë dhe se Berisha nuk kishte ndërhyrë asnjëherë për kthimin e pronave.

Fatmir Mediu, ish-ministri i Mbrojtjes, deklaroi se klubi "Partizani" nuk kishte qenë në interesin e tij si ministër dhe se dikasteri që ai drejtonte nuk kishte kompetenca mbi çështjen e planit të përhapjes. Ai tha se ministri nuk përpilon shkresa, por vetëm i firmoste ato, ndërsa përmbajtja dhe përgatitja e tyre ishin përgjegjësi e strukturave përkatëse.

Vladimir Qirjazi, ish-komandant i forcës mbështetëse, deklaroi se në mars të vitit 2009 ishte njohur me urdhrin e ministrit të Mbrojtjes, Gazmend Oketa, për firmosjen e dokumentacionit për shitjen e klubit "Partizani", por kishte kundërshtuar, pasi sipas tij, struktura që ai drejtonte nuk kishte asnjë lidhje me pronën. Ai tha se pas kontakteve me ministrin, në zyrën e tij kishte mbërritur një ekip nga Drejtoria e Antikorrupsionit, i cili i kishte kërkuar sqarime përse nuk kishte firmosur dokumentacionin.