Kapri pyet në Komisionin e Mbrojtjes për topin akustik dhe ekspertët serbë

Deputeti Erald Kapri ka ngritur në Komisionin parlamentar për Çështjet e Brendshme dhe të Mbrojtjes pyetje për praninë e një topi akustik në Shqipëri dhe për përfshirjen e mundshme të ekspertëve serbë në menaxhimin e protestave. Gjatë diskutimit me drejtorin e përgjithshëm të Policisë së Shtetit, Skënder Hita, Kapri kërkoi të dinte nëse policia disponon një top akustik, pajisje që, sipas tij, është përdorur në Serbi dhe që shkakton zhurmë të fortë për të shpërndarë protestuesit. Kapri pyeti gjithashtu nëse në Shqipëri kanë ardhur ekspertë nga Serbia për të ndihmuar në menaxhimin e protestave dhe trajnimin e efektivëve shqiptarë. Drejtori i Policisë shtetit i mohoi të dyja pretendimet, duke deklaruar se nuk ka top akustik në Shqipëri dhe se asnjë punonjës i huaj policie nuk ka marrë pjesë në menaxhimin e protestave. Kryetari i komisionit, Bledi Çuçi, i cilësoi pyetjet e Kaprit si informacione të pakonfirmuara dhe i kërkoi të vazhdojnë diskutimet me informacione të konfirmuara.