Kandidati i Listës Studentore: Kosova është pjesë e identitetit shpirtëror dhe kulturor serb

Kandidati i Listës Studentore në Serbi, Fegja Dimoviq, ka deklaruar se Kosova është pjesë përbërëse e Serbisë, duke përsëritur qëndrimin politik të kësaj liste lidhur me statusin e Kosovës. Deklarata e tij vjen pas një vizite që një delegacion i lëvizjes studentore zhvilloi në Kosovë më 7 dhe 8 nëntor.

Në një reagim publik, Dimoviq theksoi se Kosova zë një vend të rëndësishëm në programin politik të Listës Studentore, duke e cilësuar atë si pjesë të identitetit shpirtëror dhe kulturor serb. Ai tha se delegacioni kthehej me vendosmërinë për të luftuar krimin e organizuar në Serbi dhe për të mbështetur serbët që jetojnë në Kosovë.

Delegacioni përbëhej nga gjashtë kandidatë dhe përfaqësues të lëvizjes studentore, ndër ta Fegja Dimoviq, Millena Petroviq, Emillija Markoviq, Jugosllav Gashiq dhe Nemanja Karoviq. Gjatë qëndrimit në Kosovë, ata zhvilluan takim me mitropolitin e Rashkës dhe Prizrenit, Teodosije, në Manastirin e Graçanicës.

Takimi u përqendrua në gjendjen e komunitetit serb në Kosovë dhe sfidat me të cilat përballet Kisha Ortodokse Serbe. Përfaqësuesit e Listës Studentore shprehën gatishmërinë që, në rast të angazhimit të tyre në institucionet shtetërore, t’i kushtojnë vëmendje mbrojtjes së të drejtave të serbëve dhe objekteve fetare ortodokse në Kosovë.

Sipas Radio Evropa e Lirë, delegacioni nuk zhvilloi takime me përfaqësuesit politikë të serbëve të Kosovës gjatë kësaj vizite. Një tjetër zhvillim që ka tërhequr vëmendjen është qëndrimi i kandidatit nga Kosova, Jugosllav Gashiq, i cili më 7 nëntor deklaroi se Lista Studentore nuk do të bashkëpunojë me Listën Serbe.