Serbia hap sirtarët e drejtësisë pas humbjes së Vuçiçit

Pas zgjedhjeve të 25 tetorit, Serbia është në një periudhë të re të ndërtimit të drejtësisë. Arrestimet e njëpasnjëshme të zyrtarëve të policisë dhe të tjerëve janë shenjë që sistemi i drejtësisë po fillon të funksionojë. Nga policët te bankierët, po arrestohen tani zyrtarët që dikur ishin të paprekshëm.

Dy ditë pas zgjedhjeve, Prokuroria e Lartë Publike formoi një komision prej pesë anëtarësh për të kontrolluar punën e të gjitha 87 prokurorive në Serbi. Në koordinim me këtë komision, nisën disa procedura të rëndësishme, përfshirë hetimet për brutalitetin policor ndaj studentëve pas protestave të gushtit të vitit 2025.

Prokurori i lartë publik, Goran Illiç, tha se kishte pasur pengesa në të gjitha nivelet e sistemit të drejtësisë, por se tani është krijuar një klimë më e favorshme brenda prokurorive për ndjekjen e veprave penale. "Nuk ka më pengesa për të ndjekur penalisht personat që kanë kryer vepra penale, pavarësisht pozitave që mbajnë apo nëse kanë qenë të afërt me pushtetin e mëparshëm", tha ai.

Rasti i studentëve të keqtrajtuar në garazhin e Qeverisë së Serbisë është një nga raste të pazgjidhura që po rihapen. Policët e arrestuar dyshohen se kanë keqtrajtuar dhe torturuar disa persona në garazhin e ndërtesës së Qeverisë së Serbisë, më 14 gusht 2025, pas një proteste kundër pushtetit. Sipas dyshimeve, ata kanë përdorur dhunë dhe kërcënime, duke u shkaktuar dhimbje të mëdha dhe vuajtje të rënda studentëve dhe qytetarëve të tjerë.

Arrestimet e tanishme janë dëshmi se sistemi mund të funksionojë, edhe pse pushteti ende nuk ka ndryshuar. "S’u desh gjë tjetër veçse Partia Përparimtare Serbe t’i humbiste zgjedhjet, që ata të mos ndienin më presion dhe të nisnin t’i trajtonin këto raste, në mënyrë që të vihej pak drejtësi", shprehet studenti Dushan Cvetkoviç.