Zelensky shpreson për marrëveshje paqeje me Rusinë deri në fund të vitit
Presidenti ukrainas, Volodymyr Zelensky, ka deklaruar se Ukraina shpreson të arrijë rezultate konkrete në negociatat për përfundimin e luftës me Rusinë deri në fund të këtij viti.
Presidenti ukrainas, Volodymyr Zelensky, ka deklaruar se Ukraina shpreson të arrijë rezultate konkrete në negociatat për përfundimin e luftës me Rusinë deri në fund të këtij viti. Zelensky tha se varet nga mënyra se si Shtetet e Bashkuara do të zhvillojnë dialogun me Moskën.
Zelensky u shpreh në një konference të përbashkët për media me kryeministrin irlandez, Micheál Martin, pas dy ditësh bisedimesh të ndërmjetësuara nga SHBA-ja mes delegacioneve ukrainase dhe ruse në Abu Dhabi. “Ne po jetojmë përmes këtyre sulmeve masive. Natyrisht, duam të arrijmë rezultate deri në fund të këtij viti dhe, sigurisht, do të bëjmë gjithçka për ta realizuar këtë. Më shumë do të varet nga formati i dialogut mes palëve amerikane dhe ruse nesër. Besoj se është shumë e rëndësishme edhe për amerikanët që të arrijnë një rezultat këtë vit, duke pasur parasysh atë që po ndodh. Më duket se ata e dëshirojnë vërtet këtë”, u shpreh Zelensky.
Bisedimet e zhvilluara në Abu Dhabi, të parat që nga muaji shkurt, prodhuan një marrëveshje për një shkëmbim të rëndësishëm të të burgosurve të luftës, por nuk pati njoftime konkrete për përparim të madh drejt përfundimit të konfliktit. Të dërguarit e presidentit amerikan, Steve Witkoff dhe Jared Kushner, pritet të udhëtojnë në Moskë për bisedime me presidentin rus, Vladimir Putin, ndërsa më pas do të takohen me Zelenskyn në Dublin.
Kushner e cilësoi raundin e negociatave në Abu Dhabi si një “hap të parë të mirë”, por pranoi se mes dy palëve nuk ekziston besim. Ndërkohë, negociatori ukrainas David Arakhamia tha se diskutimet kishin qenë të vështira, pasi delegacioni rus kishte ardhur me “udhëzime të rrepta”, por shtoi se ishte krijuar një “momentum i mirë” drejt gjetjes së një zgjidhjeje deri në fund të vitit.
Nga ana tjetër, negociatori kryesor rus, Vladimir Medinsky, deklaroi për televizionin shtetëror rus se pas bisedimeve një marrëveshje paqeje dukej më pranë, por theksoi se shumëçka do të varej nga Ukraina dhe qëndrimi i Shteteve të Bashkuara.