Demokratët sfidojnë Trumpin për emigracionin dhe paralajmërojnë hetime ndaj ICE-së

Pas fitores në zgjedhjet e mesmandatit, demokratët në SHBA po përgatiten të sfidojnë politikat e ashpra të presidentit Donald Trump për emigracionin. Hetimet ndaj agjentëve të ICE-së, kontrolli mbi fondet e sigurisë kufitare dhe krijimi i rrugëve drejt qëndrimit të ligjshëm janë ndër prioritetet e tyre. Ligjvënësit demokratë synojnë të shfrytëzojnë kontrollin e Kongresit vitin e ardhshëm për të vënë nën presion administratën Trump, veçanërisht lidhur me arrestimet dhe dëbimet masive të emigrantëve.

Në fokus janë kushtet në qendrat e ndalimit të emigrantëve, përdorimi i forcës vdekjeprurëse nga agjentët federalë dhe dëbimi i shtetasve venezuelianë në një burg të sigurisë së lartë në El Salvador gjatë vitit 2025. Demokratët synojnë gjithashtu më shumë transparencë për mënyrën se si Departamenti i Sigurisë Kombëtare shpenzon mbi 100 miliardë dollarët që i janë ndarë nga Kongresi që nga viti i kaluar.

Pavarësisht planeve të demokratëve, rruga drejt ndryshimeve ligjore pritet të jetë e vështirë. Stafi i Dhomës së Përfaqësuesve dhe Senatit pret që Trump të përdorë të drejtën e vetos ndaj çdo projektligji që synon të kufizojë zbatimin e ligjeve të emigracionit ose të krijojë mundësi më të gjera për qëndrim të ligjshëm dhe marrjen e shtetësisë amerikane.

Pakënaqësia ndaj politikave të emigracionit të presidentit është reflektuar edhe në sondazhe. Sipas matjeve të Reuters/Ipsos, miratimi i Trump për mënyrën se si po e trajton këtë çështje ka rënë në 38% nga 50% në fillim të presidencës së tij. Edhe votuesit latino-amerikanë kanë shfaqur një orientim më të madh drejt demokratëve në zgjedhjet e fundit të mesmandatit. Megjithatë, administrata Trump nuk ka sinjalizuar ndryshim të qëndrimit.

Senatorja e zgjedhur Peggy Flanagan, nga Minesota, deklaroi gjatë festimeve pas fitores së saj: “Ne do ta shkatërrojmë ICE-në”. Ndërsa demokratja Pramila Jayapal u zotua se do të thërrasë në Kongres zyrtarët përgjegjës për arrestimet, ndalimet dhe largimet që ajo i konsideron të paligjshme.

Republikanët, nga ana tjetër, kundërshtojnë vendosjen e kufizimeve të mëtejshme ndaj ICE-së, duke argumentuar se agjencia ka marrë tashmë fonde për pajisje dhe kamera trupore. Përveç hetimeve ndaj ICE-së, demokratët po shqyrtojnë edhe mundësinë e avancimit të dy projektligjeve që lidhen me reformën e emigracionit. I pari është Akti i Dinjitetit (Dignity Act), një nismë dypartiake që synon të krijojë një rrugë drejt qëndrimit të ligjshëm për punëtorët emigrantë, duke forcuar njëkohësisht sigurinë kufitare dhe reformuar programet e vizave.

Projektligji tjetër është Akti i Ëndrrës dhe Premtimit (Dream and Promise Act), i cili synon të krijojë një rrugë drejt shtetësisë për emigrantët që kanë mbërritur në SHBA si fëmijë, të njohur si “Dreamers”. Sipas sondazheve të Gallup të cituara nga Reuters, më shumë se 80% e amerikanëve mbështesin krijimin e një rruge ligjore për këtë kategori emigrantësh.

Senatori demokrat Ruben Gallego tha se partia e tij duhet të gjejë një mënyrë për të arritur marrëveshje me Trumpin dhe se diskutimet për një projektligj në mbështetje të Dreamers mund të avancojnë deri në fund të vitit 2026. Megjithatë, ekspertët vlerësojnë se fuqia e vetos presidenciale mbetet pengesa kryesore për realizimin e një reforme të gjerë.