Ish-kreu i Policisë italiane nën hetim për manipulim të drejtësisë
Ish-shefi i Policisë italiane, Gianni De Gennaro, po hetohet për pengimin e drejtësisë dhe devijimin e hetimeve për masakrën e Via D'Amelio-s, ku u vra Paolo Borsellino dhe pesë anëtarë të eskortës së tij.

Ish-shefi i Policisë italiane, Gianni De Gennaro, po hetohet për pengimin e drejtësisë dhe devijimin e hetimeve për masakrën e Via D'Amelio-s, ku më 19 korrik 1992 u vra Paolo Borsellino dhe pesë anëtarë të eskortës së tij. Prokuroria italiane dyshon se De Gennaro dhe bashkëpunëtorët e tij kanë ushtruar presion mbi informatorin e mafies Salvatore Contorno për të mos dëshmuar dhe kanë fshehur dokumente që mund të ndihmonin në zbardhjen e një prej atentateve më të rënda të historisë italiane.
Hetuesit po rishqyrtojnë edhe rolin e Arnaldo La Barberas, ish-kreut të Skuadrës Lëvizëse të Palermos, si dhe marrëdhëniet e tij me De Gennaron. Në fokus është edhe mënyra se si u zhvilluan hetimet e para për masakrën, të cilat u njollosën nga deklarimet e rreme të Vincenzo Scarantinos dhe devijimi i hetimeve.
De Gennaro ka pasur një karrierë rreth 50-vjeçare në strukturat më të larta të shtetit italian dhe është një prej figurave kryesore të luftës kundër Cosa Nostra. Ironia e këtij hetimi qëndron pikërisht këtu: njeriu që për dekada u konsiderua një prej figurave kryesore të luftës kundër mafies, sot gjendet nën hetim për dyshime që lidhen me një nga kapitujt më të errët të historisë së antimafies italiane që u mori jetën disa magjistratëve dhe zyrtarëve të lartë.