Zbulohet magazina e kontrabandës në Tiranë, arrestohet 23-vjeçari

Një magazinë me mbi 450 pajisje dhe artikuj të kontrabanduar u zbulua në Tiranë gjatë operacionit "Infrastruktura". Në magazinë u gjetën 239 dronë të ndryshme, 75 llastiqe gjuetie, një sasi të konsiderueshme me sfera metalike dhe pajisje të tjera të kontrabanduar. 23-vjeçari që posedonte pajisjet u kap duke iu shitur llastiqe dhe sfera pjesëmarrësve në protestat e ditëve të fundit.

Operacioni "Infrastruktura" u finalizua nga Specialistët e Sektorit për Hetimin e Krimeve Ekonomiko-Financiare, pas konsultimit me prokurorin. 23-vjeçari u kap në flagrancë në rrugën "Tre Dëshmorët", duke iu shitur pjesëmarrësve në protestë 30 llastiqe gjuetie me sfera metalike, që u sekuestruan me cilësinë e provës materiale.

Më tej, u krye kontroll në një magazinë që posedonte 23-vjeçari, në rrugën "Kol Koçi", ku u gjetën pajisjet dhe artikuj të kontrabanduar. Shtetasi O. M. nuk dispononte asnjë dokumentacion për këto pajisje/artikuj.

Vijon hetimi për të dokumentuar veprimtarinë kriminale të shtetasit O. M., si dhe për të identifikuar dhe nxjerrë përpara përgjegjësisë penale, shtetas të tjerë të përfshirë në të. Materialet procedurale iu referuan Prokurorisë për veprime të mëtejshme.