Rama zbret në terren, mesazh për Policinë e Shtetit

Kryeministri Edi Rama ka reaguar pas protestave të dhunshme në Tiranë, duke shprehur mbështetjen për efektivët e Policisë së Shtetit dhe duke u bërë thirrje të tregojnë durim dhe vetëpërmbajtje ndaj të rinjve që protestojnë.

Përmes një reagimi në rrjetet sociale, Rama vlerëson punën e policisë në përbashkëtimin e situatës, ndërsa e lidh dhunën gjatë protestave me atë që e konsideron si sulm ndaj ëndrrës së Shqipërisë për anëtarësim në Bashkimin Evropian deri në vitin 2030.

“RESPEKT dhe po, jeni më të mirë në këto ditë agresioni me gurë e me zjarr mbi ëndrrën e Shqipërisë 2030 në Bashkimin Evropian”, shkruan kryeministri.

Rama kërkon nga efektivët të ruajnë qetësinë përballë të rinjve që protestojnë, ndërsa për personat që sulmojnë me gurë dhe u vënë zjarrin objekteve, përdor një gjuhë më të ashpër.

“Durim dhe vetëpërmbajtje me të rinjtë që protestojnë. Forca me gurëhedhësit dhe zjarrvënësit e maskuar”, shprehet kryeministri.

Reagimi i Ramës vjen në një klimë të tensioneve pas protestave në kryeqytet, ku janë raportuar akte dhune dhe përplasje me policinë. Ndërkohë, në deklaratën e tyre të përbashkët, eurodeputetët Marco Tarquinio dhe Andreas Schieder kanë kërkuar vetëpërmbajtje nga protestuesit, por edhe hetim për raportimet mbi përdorimin e tepruar të forcës policore.